جۋرناليستەرىنە وتكەن اپتادا اق ۇيگە كىرۋگە تىيىم سالىنعان ءۇش امەريكالىق جاڭالىقتار ۇيىمى اقش پرەزيدەنتى دونالد ترامپقا قارسى فەدەرالدىق سوتقا تالاپ ارىز بەردى، دەپ حابارلايدى infohub.kz سايتى.
NUR.KZء-تىڭ Politico-عا سىلتەمە جاساپ حابارلاۋىنشا، تالاپ قويۋشىلار — CNN، Politico جانە MS NOW. جاۋاپكەرلەر قاتارىندا مەملەكەت باسشىسىنان بولەك، ونىڭ اكىمشىلىكتەگى ءۇش نەگىزگى كەڭەسشىسى بار. باسىلىمدار ءوز تىلشىلەرىنىڭ اككرەديتاسياسىن قالپىنا كەلتىرۋدى تالاپ ەتىپ، كەنەتتەن سالىنعان تىيىمدى «كونستيتۋسيانىڭ ءبىرىنشى تۇزەتۋىنە تىكەلەي قول سۇعۋشىلىق» جانە ۇكىمەتتىڭ ءباسپاسوزدىڭ نە تۋرالى حابارلايتىنىن شەشپەيتىندىگى تۋرالى قاعيداتتى بۇزۋ دەپ باعالادى.
«اق ءۇي الدىن الا ەسكەرتۋسىز جانە پروسەستىك نورمالاردى ساقتاماي، ءبىزدىڭ جۋرناليستەرىمىزدىڭ اككرەديتاسياسىن قايتارىپ الدى، ويتكەنى ءبىزدىڭ رەپورتاجدارىمىزعا قارسى بولدى. ەگەر بۇعان (ترامپ اكىمشىلىگىنىڭ تىيىمى — رەد. ەسك.) جاۋاپ بەرىلمەسە، ءباسپاسوز بوستاندىعىنا جانە قوعامنىڭ بيلىكتىڭ ارالاسۋىنسىز تاۋەلسىز جۋرناليستيكاعا دەگەن قۇقىعىنا ءقاۋىپ تونەدى»، — دەلىنگەن باق-تىڭ بىرلەسكەن مالىمدەمەسىندە.
ۇيىمدار اقش-تىڭ ۆاشينگتونداعى وكرۋگتىك سوتىنان اكىمشىلىكتىڭ ارەكەتتەرىن كونستيتۋسياعا قايشى دەپ تانىپ، ولاردىڭ ودان ءارى ورىندالۋىنا تىيىم سالۋدى شۇعىل تۇردە سۇرادى.
تالاپ ارىز بويىنشا جاۋاپكەرلەر ترامپتان بولەك، اق ءۇي اپپاراتىنىڭ جەتەكشىسى سيۋزي ۋايلس، كوممۋنيكاسيالار جونىندەگى ديرەكتورى ستيۆەن چەنگ جانە قۇپيا قىزمەت ديرەكتورى شون كارران بولدى.
ەسكە سالايىق، 18 قىركۇيەكتە اقش پرەزيدەنتى CNN، MS NOW جانە Politico تىلشىلەرىنە اق ۇيگە كىرۋگە تىيىم سالاتىنىن مالىمدەدى، سەبەبى بۇل باسىلىمدار جالعان جاڭالىقتار تاراتادى دەپ ايىپتادى. كەلەسى كۇنى-اق وسى باسىلىمداردىڭ جۋرناليستەرى ولاردى اق ۇيگە كىرگىزبەگەنىن حابارلادى. وسىدان كەيىن دونالد ترامپ CNN، MSNBC جانە Politico لوگوتيپتەرى بار قوقىس قاپتارىنىڭ سۋرەتىن جاريالادى.