استانادا 9 تامىزدا حالىقارالىق Comic Con Astana 2026 فەستيۆالىنىڭ ءتورتىنشى ءارى قورىتىندى كۇنى وتۋدە. فينال كۇنىنىڭ باستى وقيعاسى — كوسپلەي بايقاۋىنىڭ قورىتىندىسى بولادى، دەپ حابارلايدى infohub.kz سايتى.
قاتىسۋشىلاردىڭ فينالدىق ونەرلەرى «بارىس ارەنانىڭ» باستى ساحناسىندا وتۋدە. كوسپلەيشىلەر فيلمدەر، سەريالدار، كوميكستەر، انيمە جانە بەينەويىندار كەيىپكەرلەرىنىڭ ءوز قولدارىمەن جاساعان بەينەلەرىن كورسەتەدى. ونەرلەردەن كەيىن ۇيىمداستىرۋشىلار بايقاۋ جەڭىمپازدارىن جاريالايدى.
بيىلعى فەستيۆالدىڭ حەدلاينەرلەرى — اكتەرلەر نيكولاي كوستەر-ۆالداۋ، پول اندەرسون، ينياكي گودوي جانە تاز سكايلار. Comic Con بارىسىندا ولار كورەرمەندەرمەن كەزدەسۋلەرگە قاتىسىپ، ءوز مانساپتارى مەن تانىمال جوبالارداعى جۇمىستارى تۋرالى ايتىپ، جانكۇيەرلەردىڭ سۇراقتارىنا جاۋاپ بەرىپ، فوتو جانە اۆتوگراف سەسسيالارىن وتكىزدى.
2026 جىلى Comic Con Astana بىردەن ەكى الاڭدا وتۋدە. «بارىس ارەنادا» ساحنالىق قويىلىمدار، شاقىرىلعان اكتەرلەرمەن كەزدەسۋلەر جانە باسقا دا نەگىزگى ءىس-شارالار ۇيىمداستىرىلعان. «الاۋ» مۇز سارايىندا كورمە جانە ويىن ايماقتارى، تاقىرىپتىق ستەندتەر، ينتەراكتيۆتى الاڭدار مەن فەستيۆالدىك ماركەت ورنالاسقان.
باعدارلامانىڭ جەكە بولىگى بەينەويىندارعا ارنالدى. كەلۋشىلەرگە ءارتۇرلى بۋىنداعى كونسولدەر — Dendy، Sega Mega Drive، PlayStation One جانە NES-تەن باستاپ قازىرگى زامانعى ويىن جارىستارى مەن ينتەرنەت-چەللەندجدەرگە دەيىن كورسەتىلدى. قوناقتار ءۇشىن ورتاعاسىرلىق سەمسەرلەسۋ الاڭى دا ۇيىمداستىرىلدى، وندا قالاۋشىلار ءقاۋىپسىز جاتتىعۋ جەكپە-جەكتەرىنە قاتىسا الادى.
قورىتىندى كۇن Comic Con Astana 2026-نىڭ ءتورت كۇندىك باعدارلاماسىن اياقتايدى. فەستيۆال پوپ-مادەنيەت جانكۇيەرلەرىن، كوسپلەيشىلەردى، سۋرەتشىلەردى، شىعارماشىلىق يندۋستريا وكىلدەرى مەن سيفرلىق كونتەنت جاساۋشىلاردى بىرىكتىردى.