6-9 تامىز ارالىعىندا استانادا حالىقارالىق Comic Con Astana فەستيۆالى وتەدى. ءىس-شارانىڭ باستى قوناقتارىنىڭ ءبىرى – Netflixء-تىڭ «One Piece» سەريالىنداعى ساندجي رولىمەن تانىمال بريتاندىق-يسپاندىق اكتەر تاز سكايلار، دەپ حابارلايدى infohub.kz.
اكتەر اسپاز ءارى جەكپە-جەك شەبەرى ءساندجيدىڭ ءرولى ارقىلى كەڭىنەن تانىلدى. ساندجي – تانىمال مانگا مەن انيمەنىڭ ەكراندالعان نۇسقاسىنداعى سابان قالپاقتى پيراتتار توبىنىڭ باستى مۇشەلەرىنىڭ ءبىرى.
«One Piece»-تەن باسقا، تاز سكايلار «توچكا كيپەنيا» (Boiling Point) ءفيلمى مەن سەريالىندا، «كلينەر» (Cleaner) ەكشن-تريللەرىندە، «ۋبيستۆەننايا كوماندا» (The Kill Team) اسكەري دراماسىندا جانە «اگاتا رەيزين» (Agatha Raisin) دەتەكتيۆتىك كومەدياسىندا تۇسكەن. اكتەرلىك مانساپتان بولەك، ول سەناريست، رەجيسسەر جانە پروديۋسەر رەتىندە جۇمىس ىستەيدى، سونداي-اق ەكسترەمالدى سپورت تۇرلەرىنە اۋەس.
فەستيۆال كەزىندە ءارتىس Comic Con Astana-نىڭ باستى ساحناسىنا شىعىپ، جانكۇيەرلەرىمەن كەزدەسىپ، ولاردىڭ سۇراقتارىنا جاۋاپ بەرىپ، اۆتوگراف جانە فوتوسەسسيالارعا قاتىسادى.
تاعى ءبىر شەتەلدىك قوناق – وڭتۇستىككورەيالىق K-pop توبى Kandis. ۇجىم فەستيۆال قوناقتارىنا ارنالعان ارنايى باعدارلاما ۇسىنادى. بۇعان دەيىن توپ قازاقستاندا وتكەن Silk Way Star حالىقارالىق تەلەۆيزيالىق ۆوكالدىق بايقاۋىندا وڭتۇستىك كورەيانىڭ اتىنان قاتىسقان.
Comic Con Astana ورتالىق ازياداعى زاماناۋي پوپ-مادەنيەتتىڭ ەڭ ءىرى فەستيۆالى سانالادى. ول جىل سايىن ءارتۇرلى ەلدەردەن كينو، سەريال، انيمە، كوميكس، بەينەويىن جانە كوسپلەي اۋەسقويلارىن جينايدى.
2026 جىلى فەستيۆال تاعى دا ەكى الاڭدا – Barys Arena جانە «الاۋ» مۇز سارايىندا وتەدى. ورتالىق وقيعالاردىڭ ءبىرى – جۇلدە قورى 20 ملن تەڭگەنى قۇرايتىن حالىقارالىق كوسپلەي بايقاۋى.
فەستيۆالگە بيلەتتەر Comic Con Astana رەسمي سايتىندا قولجەتىمدى.