اقش-تىڭ ميچيگان شتاتىندا تىركەلگەن سيكلوسپوروز جاعدايلارىنىڭ سانى 9 680-گە جەتتى. تاۋلىك ىشىندە كورسەتكىش 427-گە ءوستى، دەپ حابارلايدى infohub.kz سايتى.
جەرگىلىكتى دەنساۋلىق ساقتاۋ ورگاندارىنىڭ مالىمەتىنشە، 23 شىلدەدەگى جاعداي بويىنشا 160 ادام اۋرۋحاناعا جات قىزىلعان. ءولىم جاعدايى تىركەلمەگەن.
سيكلوسپوروز — بۇل Cyclospora ميكروسكوپيالىق ءپارازيتى تۋدىراتىن ىشەك اۋرۋى. جۇقتىرۋ ادەتتە لاستانعان شيكى جەمىستەردى، كوكونىستەردى نەمەسە سۋدى تۇتىنۋدان بولادى.
نەگىزگى بەلگىسى — ۇزاققا سوزىلاتىن سۋلى ديارەيا. سونىمەن قاتار ءىشتىڭ اۋىرۋى، جۇرەك اينۋ، السىزدىك، تابەتتىڭ تومەندەۋى جانە سالماق جوعالتۋ مۇمكىن.
ىندەت ايسبەرگ سالاتىمەن بايلانىستىرىلدى. اقش-تىڭ تاماق ونىمدەرى مەن دارى-دارمەكتەردىڭ ساپاسىن قاداعالاۋ باسقارماسى جاعدايلاردىڭ ءبىر بولىگى تۋرالعان ايسبەرگ سالاتىمەن بايلانىستى ەكەنىن انىقتادى.
ءونىمدى Taylor Farms كومپانياسى ورتالىق مەكسيكاداعى كاسىپورنىنان جەتكىزگەن. سالات Taco Bell فاست-فۋد جەلىسى مەكەمەلەرىندە پايدالانىلعان.
بيلىك باسقا ىقتيمال جۇقتىرۋ كوزدەرىن ىزدەۋدى جالعاستىرۋدا، سەبەبى ىندەت اۋقىمى سالاتپەن تىكەلەي بايلانىستى جاعدايلار سانىنان اسىپ تۇسەدى. Taylor Farms ونىمىنەن قانشا ادامنىڭ جۇقتىرعانى ازىرگە بەلگىسىز.
ىندەت ونداعان شتاتتى قامتىدى. مامىر ايىنىڭ باسىنان بەرى اقش-تىڭ اۋرۋلاردى باقىلاۋ جانە الدىن الۋ ورتالىقتارى سيكلوسپوروزدىڭ 4 173 زەرتحانالىق راستالعان جاعدايى تۋرالى مالىمەت الدى.
سونىمەن قاتار، CDC-گە كەمىندە 41 شتاتتا تاعى 7 400-دەن استام كۇدىكتى جاعداي بەلگىلى. بۇل دەرەكتەر قوسىمشا تەكسەرۋدى قاجەت ەتەدى. فەدەرالدىق ستاتيستيكا مەن شتات دەرەكتەرى اراسىنداعى الشاقتىق جەرگىلىكتى بيلىكتىڭ زەرتحانالىق راستالعان عانا ەمەس، ىقتيمال جاعدايلاردى دا ەسەپكە الۋىنا بايلانىستى.