اقش سەناتىنىڭ مۇشەسى تەممي داكۆورت پەنتاگون مەن فەدەرالدىق اۆياسيا اكىمشىلىگىنە (فاا) حات جولداپ، ترامپ اكىمشىلىگىنىڭ ۆيردجينيا شتاتىندا سالۋدى جوسپارلاپ وتىرعان «سالتانات قاقپاسى» جوباسىن سىنادى. ول بۇل جوبانى «اقىلعا سىيمايتىن» دەپ اتاپ، اۋە كەڭىستىگىنىڭ قاۋىپسىزدىگىن ارتتىرۋعا كۇش سالۋعا شاقىردى، دەپ حابارلايدى infohub.kz سايتى.
داكۆورتتىڭ حاتىندا: «امەريكا حالقى ترامپتىڭ ءقاۋىپتى جوسپارىنا، اسىرەسە قاقپاعا مەرگەندەر ورنالاستىرىپ، دروندار ۇشىرۋدى جوسپارلاسا، اۋەجايعا كەلەتىن قاربالاس تراەكتوريا بويىندا 250 فۋت (72 م) بيىكتىكتەگى قۇرىلىستىڭ كۋاسى بولۋعا توزە المايدى»، – دەلىنگەن. حاتتى ءبي-بي-سيدىڭ امەريكالىق سەرىكتەسى سي-بي-ەس نيۋس العان.
الايدا فاا وتكەن اپتادا بۇل اۋقىمدى قۇرىلىس اۋەجايعا كەلەتىن جانە كەتەتىن رەيستەرگە ءقاۋىپ توندىرمەيدى دەپ شەشىم شىعاردى. بەيسەنبىدە ترامپ تاعايىنداعان ادامدار باسقاراتىن تاريحي مۇرانى ساقتاۋ جونىندەگى كەڭەس جەرگىلىكتى شەنەۋنىكتەرمەن اتالعان قۇرىلىستىڭ ايماقتاعى 42 تاريحي نىسانعا اسەرى تۋرالى مىندەتتى كەڭەسۋلەردى توقتاتاتىنىن جاريالادى.
كەڭەس حابارلاماسىندا فەدەرالدىق ەسكەرتكىشتەردى باسقاراتىن ۇلتتىق پارك قىزمەتى وسى نىساندارعا ىقتيمال زياندى ازايتۋ جوسپارىن ۇسىنعانى، ءبىراق جەرگىلىكتى تاريحي مۇرانى ساقتاۋ جونىندەگى قىزمەتكەرلەر «سالتانات قاقپاسىنىڭ ماقساتى مەن قاجەتتىلىگىنە قاتىستى الاڭداۋشىلىق بىلدىرگەنى» ايتىلعان. ولار سونداي-اق قىزمەتتىڭ ىقتيمال زياندى جەتكىلىكتى انىقتاعانىنا جانە ولاردى جويۋ ءۇشىن جەتكىلىكتى شارالار جوسپارلاعانىنا كۇمان كەلتىردى.
فەدەرالدىق جانە شتاتتىق شەنەۋنىكتەر جوبانىڭ زياندى ازايتۋ جوسپارلارى تۋرالى كەلىسىمگە كەلۋگە مىندەتتى ەمەس، ال ەكى تاراپ كەلىسە الماسا، بۇل كەڭەسۋلەردى توقتاتۋعا رۇقسات ەتىلەدى. كەڭەس وسى پروسەستىڭ قورىتىندى ەسەبىن كەلەسى ايدىڭ باسىندا ۇسىنۋدى جوسپارلاپ وتىر.
سونىمەن قاتار، ۆيردجينيا شتاتىنان سايلانعان دەموكراتيالىق پارتيانىڭ كونگرەسمەنى دون بەيەر قاقپا تۇرعىزىلاتىن الاڭدا قازبا جۇمىستارى باستالىپ كەتكەنىن ايتادى.
قاقپاعا قارسى كونگرەسس وپپوزيسياسىن باسقارىپ وتىرعان بەيەر بەيسەنبىدە الاڭعا بارعاندا اۋىر تەحنيكامەن جۇمىس ىستەپ جاتقان جۇمىسشىلاردى كورگەنىن، ولار وعان «توپىراق قۇرامىن باعالاۋ ءۇشىن ارحەولوگيالىق جۇمىستار جۇرگىزىپ جاتقانىن» ايتقانىن جەتكىزدى. بۇل «قاتتى الاڭداتادى»، دەيدى بەيەر، اسىرەسە اكىمشىلىك جۇمىس باستالعانعا دەيىن 48 ساعات بۇرىن حابارلاۋعا مىندەتتى بولعاندىقتان. «اكىمشىلىك وسى جوبانىڭ سالدارىن ءتۇسىنۋ ءۇشىن قاجەتتى قاراپايىم جۇمىستى ءالى اتقارماي تۇرىپ، الاڭداعى قىزمەتتى جالعاستىرىپ جاتقان سياقتى»، – دەپ جازدى بەيەر.
وسى جىلدىڭ باسىنداعى ديزاين جوباسىندا قاقپانىڭ توبەسىندە التىن قاناتتى ازاتتىق حانىمى، ونىڭ ەكى جاعىندا ەكى التىن قىران بەينەلەنگەن، ال قۇرىلىستىڭ ەكى جاعىنا التىن ارىپتەرمەن «One Nation Under God» جانە «Liberty and Justice for All» دەگەن سوزدەر جازىلعان.