پاريج ماڭىنداعى كولومب كوممۋناسىندا 69 جاستاعى شۆەد ازاماتى دانيەل سيادتىڭ ءمايىتى تابىلدى. ونى امەريكاندىق قارجىگەر دجەففري ەپشتەيننىڭ ىسىمەن بايلانىستىرعان. ءولىم فاكتىسى بويىنشا تەرگەۋ باستالدى، سەبەبى ازىرگە انىقتالماعان. بۇل تۋرالى Infohub.kz ربك-عا سىلتەمە جاساپ حابارلايدى.
سيادتىڭ ەسىمى ەپشتەين ءىسى بويىنشا ماتەريالداردا بىرنەشە رەت كەزدەستى. اقش ادىلەت مينيسترلىگى جاريالاعان قۇجاتتارعا سايكەس، ول 2 090 رەت ەسكە الىنعان. تەرگەۋ ونى قارجىگەرگە قىزدارمەن تانىستىرعان ىقتيمال دەلدال دەپ قاراستىردى.
2026 جىلدىڭ مامىرىندا بەرگەن سۇحباتىندا سياد ەپشتەينگە قىزداردى الىپ كەلگەنىن جوققا شىعارمادى، ءبىراق Victoria's Secret كومپانياسىندا سكاۋت جانە كاستينگ-ديرەكتورى بولىپ جۇمىس ىستەگەنىن، ال ەپشتەينمەن قارىم-قاتىناسى «تەك كاسىبي» بولعانىن ايتتى. بەس ايەل سيادتى زورلاۋ جانە جىنىستىق زورلىق-زومبىلىق جاسادى دەپ ايىپتادى، ول بارلىق ايىپتاردى جوققا شىعاردى. فرانسۋز قۇقىق قورعاۋ ورگاندارى ودان جاۋاپ الۋعا ۇلگەرمەدى.
بۇعان دەيىن اقش ادىلەت مينيسترلىگى ەپشتەيننىڭ سىبايلاستارىنىڭ ەسىمدەرىن قۇپياسىزداندىرۋعا مىندەتتەلدى. سونىمەن قاتار، قارجىگەردىڭ جيىرماعا جۋىق جاڭا بولجامدى قۇربانى پاريج پروكۋراتۋراسىنا جۇگىندى.