دانيا سىرتقى ىستەر مينيسترلىگى اقش پەن گرەنلانديا اراسىنداعى ارال قاۋىپسىزدىگى تۋرالى كەلىسىمنىڭ ءماتىنىن جاريالادى — شارتتىڭ ەگجەي-تەگجەيى بەلگىلى بولدى، دەپ حابارلايدى infohub.kz سايتى.
قۇجات 22 قىركۇيەكتە قول قويىلعان. وندا تاراپتار اركتيكاداعى ناتو بەلسەندىلىگىن كۇشەيتۋدى، سونىڭ ىشىندە جوسپارلاۋ، اسكەري قاتىسۋ، جاتتىعۋلار وتكىزۋ جانە بارلاۋ دەرەكتەرىن بىرلەسىپ جيناۋدى قولدايتىنى ايتىلعان.
كەلىسىمگە سايكەس، اقش-قا گرەنلاندياداعى پيتۋففيك اەروعارىشتىق اسكەري بازاسىن جاڭعىرتىپ، قىزمەتىن كەڭەيتۋگە، سونداي-اق نارسارسسۋاك ەلدى مەكەنىندە جانە مەستەرسۆيگ اسكەري بەكەتىندە قوسىمشا قورعانىس اۋماعىن قۇرۋعا رۇقسات بەرىلگەن.
سونىمەن قاتار، اقش گرەنلانديادا قوسىمشا قورعانىس اۋماقتارىن قۇرىپ، اسكەري وپەراسيالارىن كۇشەيتە الادى نەمەسە اسكەري نىساندارىن نىعايتا الادى.
امەريكالىق ۇشاقتار گرەنلانديانىڭ بۇكىل اۋماعىنىڭ ۇستىنەن ۇشىپ، ونىڭ ىشىندە اۋماقتىق سۋلاردا قونۋعا قۇقىلى، ال اقش-تىڭ مەملەكەتتىك كەمەلەرى گرەنلانديانىڭ اۋماقتىق سۋلارىنا سۋ استىنان كىرىپ، وندا ەشقانداي شەكتەۋسىز جۇزە الادى.
گرەنلانديا تۋرالى كەلىسىم مەرزىمسىز بولىپ تابىلادى جانە ول 1951 جىلعى قورعانىس كەلىسىمىنىڭ XIII بابىنا سايكەس تاراپتاردىڭ ءوزارا كەلىسىمىمەن عانا وزگەرتىلە الادى.
بۇدان بولەك، بولاشاقتا گرەنلانديا تاۋەلسىزدىك السا، قۇجات دانيا مەن گرەنلانديا ۇكىمەتتەرىن ارالدىڭ ناتو-عا مۇشەلىگىن ساقتاۋعا نەمەسە الۋعا كەلىسەتىنىنە جانە دانيا وسى كەلىسىمگە قول قويعان كەزدە وزىنە العان بارلىق مىندەتتەمەلەردى ورىندايتىنىنا كەپىلدىك بەرۋگە مىندەتتەيدى.
ەسكە سالايىق، دانيا، گرەنلانديا جانە اقش بۇۇ باس اسسامبلەياسىندا ارال قاۋىپسىزدىگى تۋرالى كەلىسىمگە قول قويعان بولاتىن. ال دونالد ترامپ سول ۋاقىتتا امەريكاندىق اسكەري بازالاردىڭ اۋماعىندا قۇرىلىس سالۋدى جاريالادى.