دانيا سىرتقى ىستەر ءمينيسترى لارس لەككە راسمۋسسەن قازاقستاننان ۋكرايناداعى اتىستى توقتاتۋعا قول جەتكىزۋ ءۇشىن ماسكەۋمەن ديپلوماتيالىق بايلانىستى پايدالانۋدى سۇرادى. ول بۇل تۋرالى قازاقستاننىڭ سىرتقى ساياسي ۆەدومستۆوسىنىڭ باسشىسى مۇحتار تىلەۋبەردىمەن كەزدەسكەن سوڭ جۋرناليستەرگە مالىمدەدى، دەپ حابارلايدى infohub.kz سايتى.
«مەن قازاقستاننان ۋكراينادا اتىستى توقتاتۋ جانە بەيبىتشىلىككە قول جەتكىزۋ تۋرالى كەلىسىمدەرگە جەتۋ ءۇشىن ماسكەۋمەن ديپلوماتيالىق بايلانىستى پايدالانۋدى سۇرادىم»، — دەپ كەلتىرەدى راسمۋسسەننىڭ ءسوزىن تاسس.
قازاقستان سىرتقى ىستەر مينيسترلىگىندە دە مۇحتار تىلەۋبەردىنىڭ لارس لەككە راسمۋسسەنمەن بولعان كەزدەسۋى تۋرالى ايتىلدى. ۆەدومستۆونىڭ دەرەگىنشە، دانيالىق مينيستر دانيانىڭ قازاقستانمەن ىنتىماقتاستىقتى ودان ءارى كەڭەيتۋگە مۇددەلى ەكەنىن راستاپ، ءوز ەلىنىڭ سىرتقى ساياسي جانە ەكونوميكالىق كۇن تارتىبىندە ورتالىق ازيانىڭ ماڭىزى ارتىپ كەلە جاتقانىن اتاپ ءوتتى.
سونىمەن قاتار قۇرمەتتى قوناق لارس تۋەسەننىڭ قازاقستانداعى دانيا ەلشىسى جانە دانيا ءسىم-نىڭ ورتالىق ازيا جونىندەگى ارنايى وكىلى بولىپ تاعايىندالۋى تۋرالى پىكىر ءبىلدىردى.