قازاقستاندىقتار ءدارىحانادان جازىلعان ءدارىنىڭ ءبىر بولىگىن عانا الىپ، پروۆيزوردىڭ رەسەپتىنى وزىندە قالدىرىپ قوياتىن جاعدايعا ءجيى تاپ بولادى. مۇنداي جاعدايدا ەمدەۋ كۋرسىن قالاي تولىقتىرۋعا بولاتىنىن مەديسينالىق جانە فارماسەۆتيكالىق باقىلاۋ كوميتەتى ءتۇسىندىردى، دەپ حابارلايدى infohub.kz سايتى.
زاڭ بويىنشا، ەگەر ءدارى ءبولىپ بەرىلسە، ءدارىحانا رەسەپتىنىڭ كوشىرمەسىن عانا قالدىرىپ، ءتۇپنۇسقاسىن ناۋقاسقا قايتارۋعا مىندەتتى. الايدا مۇندا دا ەسكەرەتىن جايتتار بار.
«ەگەر پرەپارات تولىق قاپتامامەن نەمەسە تولىق مولشەردە بەرىلمەسە، فارماسەۆت رەسەپتىنىڭ سىرت جاعىنا ناقتى بەرىلگەن مولشەردى جازادى. مۇنداي رەسەپت ناۋقاسقا قايتارىلادى، ال ونىڭ كوشىرمەسى ءدارىحانادا قالادى — بۇل ناقتى بەرىلگەن كولەمدى ەسەپكە الۋعا جانە ەمدەۋدى ۇزبەۋگە مۇمكىندىك بەرەدى»، — دەپ ءتۇسىندىردى ۆەدومستۆو.
ءدال وسى قۇجاتپەن ازامات كەيىن ءدارىنىڭ قالعان بولىگىن ساتىپ الا الادى.
سونىمەن قاتار، ەرەكشەلىكتەر دە بار. ەگەر رەسەپت ارنايى ەسەپكە الىناتىن پرەپاراتتارعا نەمەسە ەرەجەلەردە ءدارىحانادا ساقتاۋ كوزدەلگەن وزگە دە ساناتتاعى رەسەپتتەرگە جازىلسا، ول ءدارىحانادا قالادى جانە ناۋقاسقا قايتارىلمايدى.
مۇنداي ساناتتارعا، اتاپ ايتقاندا، قۇرامىندا ەسىرتكى زاتتارى، پسيحوتروپتىق زاتتار جانە ولاردىڭ پرەكۋرسورلارى بار دارىلەرگە، سونداي-اق زاتتىق-ساندىق ەسەپكە الىناتىن پرەپاراتتارعا جازىلعان رەسەپتتەر جاتادى.
كوميتەت سونداي-اق قاراپايىم رەسەپتىنىڭ ءبىر اي بويى جارامدى ەكەنىن، ال قۇرامىندا ەسىرتكى، پسيحوتروپتىق جانە كۇشتى اسەر ەتەتىن زاتتارى بار پرەپاراتتارعا جازىلعان رەسەپتىنىڭ 15 كۇنتىزبەلىك كۇنگە جارامدى ەكەنىن اتاپ ءوتتى.
«ەگەر رەسەپتتە كوزدەلگەن پرەپارات مولشەرى دارىحانامەن تولىق بەرىلسە، وسى رەسەپتىنى ءدارىنىڭ جاڭا پارتياسىن الۋ ءۇشىن قايتا پايدالانۋ قاراستىرىلماعان»، — دەپ ءتۇسىندىردى ۆەدومستۆو.
بۇعان دەيىن قازاقستاندىق ايەل الماتى ءدارىحانالارىندا ءدارى بەرۋدىڭ ءارتۇرلى ەرەجەلەرىنە تاپ بولعانىن: كەي جەردە رەسەپتىنى الىپ قوياتىنىن، كەي جەردە قايتاراتىنىن، ال كەيبىرىندە ءتىپتى سۇرامايتىنىن شاعىمدانعان ەدى.