شىعىس قازاقستان وبلىسىنىڭ اكىمى وكىمىمەن ءوڭىر باسشىسىنىڭ ءبىرىنشى ورىنباسارى بولىپ دارحان ساپانوۆ تاعايىندالدى، دەپ حابارلايدى infohub.kz NUR.KZ-گە سىلتەمە جاساپ.
ۆەدومستۆونىڭ رەسمي سايتىندا حابارلانۋىنشا، دارحان ساپانوۆ 1985 جىلى 2 قاڭتاردا شىعىس قازاقستان وبلىسى تارباعاتاي اۋدانىنىڭ اقجار اۋىلىندا دۇنيەگە كەلگەن.
جوعارى ءبىلىمدى بىرنەشە وقۋ ورنىندا العان. 2007 جىلى سارىكبايەۆ اتىنداعى شىعىس قازاقستان مەملەكەتتىك تەحنيكالىق ۋنيۆەرسيتەتىن «ونەركاسىپتىك جىلۋەنەرگەتيكا» ماماندىعى بويىنشا ينجەنەر بىلىكتىلىگىمەن ءتامامداعان. 2009 جىلى امانجولوۆ اتىنداعى شىعىس قازاقستان مەملەكەتتىك ۋنيۆەرسيتەتىن «مەنەدجمەنت» ماماندىعى بويىنشا بىتىرگەن. 2022 جىلى رەسەي فەدەراسياسى پرەزيدەنتىنىڭ جانىنداعى رەسەي حالىق شارۋاشىلىعى جانە مەملەكەتتىك قىزمەت اكادەمياسىن Doctor of Business Administration (DBA) باعدارلاماسى بويىنشا اياقتاعان.
ەڭبەك جولىن 2007 جىلى باستاعان. ءار جىلدارى شىعىس قازاقستان وبلىسى مەملەكەتتىك ساۋلەت-قۇرىلىس باقىلاۋ دەپارتامەنتىنىڭ ينسپەكسيالاۋ ءبولىمىنىڭ باس مامانى، «استاناەنەرگوسبىت» ج ش س حالىقپەن جۇمىس دەپارتامەنتىنىڭ ينجەنەرى، سونداي-اق ق ر ەنەرگەتيكا جانە مينەرالدى رەسۋرستار مينيسترلىگىنىڭ ەلەكتر ەنەرگەتيكاسى جانە كومىر ونەركاسىبىن دامىتۋ دەپارتامەنتىنىڭ ساراپشىسى بولىپ جۇمىس ىستەگەن.
2009-2020 جىلدار ارالىعىندا ق ر پرەمەر-مينيسترى كەڭسەسىندە ءارتۇرلى لاۋازىمداردى اتقارعان: باس ساراپشى، باس كەڭەسشى، سەكتور مەڭگەرۋشىسى، باس ينسپەكتور جانە يندۋستريالىق-يننوۆاسيالىق دامۋ ءبولىمى مەڭگەرۋشىسىنىڭ ورىنباسارى. 2020-2023 جىلدار ارالىعىندا ق ر پرەزيدەنتى اكىمشىلىگىنىڭ مەملەكەتتىك ينسپەكتورى بولعان.
2023 جىلعى اقپاننان باستاپ شىعىس قازاقستان وبلىسى اكىمىنىڭ ورىنباسارى قىزمەتىن اتقارعان. مەملەكەتتىك قىزمەتكە قوسقان ۇلەسى ءۇشىن 2018 جىلى دارحان ساپانوۆ «ەرەن ەڭبەگى ءۇشىن» مەملەكەتتىك مەدالىمەن ماراپاتتالعان.
«دارحان ساپانوۆتىڭ وبلىس اكىمىنىڭ ءبىرىنشى ورىنباسارى بولىپ تاعايىندالۋى – ونىڭ مەملەكەتتىك باسقارۋ، ونەركاسىپتى دامىتۋ جانە الەۋمەتتىك-ەكونوميكالىق ساياساتتى جۇزەگە اسىرۋمەن بايلانىستى كاسىبي مانسابىنىڭ كەزەكتى كەزەڭى»، – دەپ اتاپ ءوتتى اكىمدىكتە.
ەسكە سالا كەتەيىك، بۇرىن شقو اكىمىنىڭ ءبىرىنشى ورىنباسارى قىزمەتىن جاقسىلىق ومار اتقارعان ەدى. بيىل ساۋىردە ول الاياقتىق جانە پارا الۋ ءۇشىن 6 جىلعا باس بوستاندىعىنان ايىرىلدى. ول اپەللياسيالىق شاعىم تۇسىرگەن، ءبىراق ۇكىم كۇشىندە قالدى. وسىدان كەيىن ءوڭىر باسشىسى نۇرىمبەت ساكتاعانوۆ بەلگىلەنگەن تارتىپپەن ءوز وتستاۆكاسى تۋرالى ءوتىنىش بىلدىرگەن. قاراۋ ناتيجەسىندە ىسكە قاتىسى جوقتىعى ەسكەرىلىپ، ونى قاناعاتتاندىرماۋ تۋرالى شەشىم قابىلدانعان.