اۆستراليانىڭ دارۆين قالاسىنداعى كورولدىك اۋە كۇشتەرى بازاسىنا زاڭسىز كىرىپ، قورعانىس سالاسىنىڭ قىزمەتكەرىنە شابۋىل جاساعان بەيمالىم ادام ۇرلانعان كولىكپەن قاشىپ كەتتى. وقيعا ۆيننەللي اۋدانىنداعى اسكەري نىساندا دۇيسەنبى كۇنى تۇستەن كەيىن بولعان، دەپ حابارلايدى infohub.kz سايتى.
قورعانىس ۆەدومستۆوسىنىڭ مالىمدەمەسىندە اتالعان ادام بازا اۋماعىنا «زاڭسىز كىرگەنى» راستالدى. ۆەدومستۆونىڭ حابارلاۋىنشا، وقيعا ورنىنا دارۆين اۋە بازاسىنىڭ كۇزەت قىزمەتى، بىرلەسكەن اسكەري پوليسيا ءبولىمى، سولتۇستىك اۋماق پوليسياسى جانە اۆستراليا فەدەرالدىق پوليسياسى جۇمىلدىرىلعان. سونىمەن قاتار بازانى ق ۇلىپتاۋ ءتارتىبى مەن حاتتامالارى ىسكە قوسىلعان.
قورعانىس ۆەدومستۆوسىنىڭ دەرەگىنشە، كۇدىكتى قورعانىس قىزمەتكەرىنە شابۋىل جاساپ، سودان كەيىن ۇرلانعان كولىكپەن بازادان شىعىپ كەتكەن.
تەرگەۋدى جۇرگىزىپ جاتقان سولتۇستىك اۋماق پوليسياسى وقيعاعا دۇيسەنبى كۇنى ساعات 16:30 شاماسىندا ارالاسقانىن راستادى. كۇدىكتى سوڭعى رەت بازادان شامامەن 15 شاقىرىم جەردە ۇرلانعان كولىكپەن كەتىپ بارا جاتقان جەردە كورىنگەن.
پوليسيانىڭ مالىمدەمەسىندە كولىك كەيىن ستيۋارت تاس جولىمەن وڭتۇستىككە قاراي جۇرگەن جەردە بايقالىپ، قۋعىن باستالعانى، الايدا پالمەرستون ماڭىندا پوليسيا كولىكتى كوزدەن تاسا قىلعان سوڭ قۋعىن توقتاتىلعانى ايتىلعان. تەرگەۋ جالعاسۋدا.
پوليسيا قۇقىقبۇزۋشىنىڭ جەكە باسى ءالى انىقتالماعانىن، ال ۇرلانعان كولىك اق ءتۇستى Ford Ranger ەكەنىن حابارلادى.