وتكەن دەمالىس كۇندەرى پاۆلودار وبلىسىنا بۇرشاق ارالاس داۋىل سوعىپ، 11 ەلدى مەكەندى جارىقسىز قالدىردى جانە ونداعان ءۇيدىڭ توبەسى مەن قاسبەتىن زاقىمدادى. بۇل تۋرالى infohub.kz سايتى حابارلادى.
وبلىس اكىمدىگىنىڭ مالىمەتىنشە، ەڭ اۋىر زالال اقسۋ قالاسىنداعى قالقامان كەنتى مەن ەكىباستۇز ماڭىنداعى قۇدايكول اۋىلىندا تىركەلگەن. وندا ەكى كوپپاتەرلى جانە 47 جەكە ءۇيدىڭ توبەسى ءىشىنارا ج ۇلىنىپ كەتكەن. قالقاماندا ەكى مەكتەپ پەن مادەنيەت ءۇيىنىڭ قاسبەتى مەن تەرەزەلەرى ب ۇلىنگەن، ال ءبىر كوپپاتەرلى ءۇيدىڭ بىرنەشە پاتەرىندە بولمە ارالىق قابىرعالار قۇلاعان.
تابيعي اپات سالدارىنان اقسۋ مەن ەكىباستۇزدىڭ 11 ەلدى مەكەنى جارىقسىز قالدى. سونىمەن قاتار، قالقامان مەن قۇدايكول اراسىنداعى ەەك 220 كۆ ەلەكتر بەرۋ جەلىسىنىڭ ۋچاسكەسىندە سەگىز تىرەك زاقىمدانعان. قازىرگى كەزدە ەنەرگەتيكتەر اۆاريالىق-قالپىنا كەلتىرۋ جۇمىستارىن جالعاستىرۋدا. سەگىز ەلدى مەكەندە ەلەكترمەن جابدىقتاۋ تولىق قالپىنا كەلتىرىلسە، تاعى ۇشەۋىندە ءىشىنارا بەرىلىپ تۇر.
وبلىس اكىمى اساين بايحانوۆ زاقىمدانعان نىسانداردى ارالاپ، جەرگىلىكتى تۇرعىندارمەن كەزدەسىپ، ءتيىستى ۆەدومستۆولار، اكىمدىكتەر، ازاماتتىق قورعاۋ قىزمەتتەرى مەن كوممۋنالدىق كاسىپورىندار وكىلدەرىنىڭ قاتىسۋىمەن جەدەل كەڭەس وتكىزدى. «بارلىق زاقىمدانعان نىسانداردى تەكسەرۋدى مۇمكىندىگىنشە تەز ارادا اياقتاپ، ەلەكترمەن جابدىقتاۋدى تولىق قالپىنا كەلتىرىپ، شاتىرلار مەن باسقا دا زاقىمدانعان قۇرىلىمداردى جوندەۋدى ۇيىمداستىرىپ، زارداپ شەككەن ۇيلەردىڭ تۇرعىندارىنا قاجەتتى كومەك كورسەتۋ قاجەت»، — دەپ تاپسىردى اكىم. ونىڭ ايتۋىنشا، مەكتەپتەر مەن باسقا دا الەۋمەتتىك نىسانداردى قالپىنا كەلتىرۋگە ەرەكشە نازار اۋدارىلىپ، ولاردىڭ ودان ءارى پايدالانۋعا ۋاقىتىلى دايىندالۋى قاجەت.
ارنايى كوميسسيالار كەلتىرىلگەن زالالدى باعالاۋدى جالعاستىرۋدا. اكىمدىكتىڭ دەرەگىنشە، داۋىلدان قازا تاپقاندار مەن زارداپ شەككەندەر جوق. ەسكە سالا كەتەيىك، تابيعي اپات ايماققا 19 شىلدەدە سوققان بولاتىن. داۋىلدى جەل نايزاعاي مەن بۇرشاقپەن بىرگە بولدى.
بۇعان دەيىن داۋىلدان كەيىن وبلىستىڭ التى تۇرعىنى، ونىڭ ىشىندە ءۇش ءجاسوسپىرىم مەديسينالىق كومەككە جۇگىنگەنى حابارلانعان بولاتىن. پاۆلوداردا بۇرشاق ارالاس داۋىل جاعالاۋداعى ۇلكەن ەكراننان الەم چەمپيوناتىنىڭ فينالىن تاماشالاپ وتىرعان فۋتبول جانكۇيەرلەرىن اڭ-تاڭ قالدىردى. ال ەكىباستۇزدا بيلىك جەرگىلىكتى دەڭگەيدەگى توتەنشە جاعداي رەجيمىن جاريالاۋدى كوزدەپ وتىر.