قازاقستاننىڭ ءبىرقاتار وڭىرىندەگى جوعارى تەمپەراتۋرا اۆتوموبيل جولدارىندا سەمەنتبەتون جابىنىنىڭ دەفورماسياسىنا اكەلدى. كولىك مينيسترلىگى بۇل قۇبىلىستىڭ سەبەپتەرىن ءتۇسىندىرىپ، ونى تابيعي فيزيكالىق پروسەسس دەپ اتادى. بۇل الەمدىك تاجىريبەمەن راستالادى، دەپ حابارلايدى infohub.kz سايتى.
كولىك مينيسترلىگىنىڭ جول اكتيۆتەرىنىڭ ۇلتتىق ساپا ورتالىعى تۇسىندىرگەندەي، ەلىمىزدىڭ كەيبىر وبلىستارىندا اۋا +35…+40 °C-قا دەيىن، ال جول بەتى +60…+70 °C جانە ودان دا جوعارى قىزادى. مۇنداي جاعدايدا سەمەنتبەتون پليتالارى كەڭەيىپ، ىشكى قىسۋ كەرنەۋىن تۋدىرادى. كريتيكالىق ماندەرگە جەتىپ، دەفورماسيالىق جىكتەر تولىق وتەي الماعان كەزدە، جەكەلەگەن ۋچاسكەلەردە پليتالاردىڭ قيسايۋى نەمەسە جەرگىلىكتى كوتەرىلۋى بايقالادى.
ورتالىق ماماندارى بۇل بەلگىلى پايدالانۋ تاۋەكەلى ەكەنىن جانە ساپاسىز قۇرىلىستىڭ بەلگىسى ەمەس ەكەنىن اتاپ ءوتتى. مۇنداي جاعدايلار اقش، كانادا، ۇلىبريتانيا، گەرمانيا، وڭتۇستىك كورەيا، اۆستراليا جانە باسقا ەلدەردە دە تىركەلگەن. «ءتىپتى جوبالاۋ جانە سالۋ تالاپتارى تولىق ساقتالعان كەزدە دە سەمەنتبەتون جابىندارى فيزيكا زاڭدارىنا باعىنادى جانە ەكسترەمالدى كليماتتىق جاعدايلاردا ايتارلىقتاي تەمپەراتۋرالىق اسەرگە ۇشىرايدى»، — دەدى ماماندار.
اقاۋلاردىڭ نەگىزگى فاكتورلارى دەپ: ۇزاق انومالدى ىستىق، جابىننىڭ ايتارلىقتاي قىزۋى، تەمپەراتۋرالىق كەرنەۋلەردىڭ جيناقتالۋى، دەفورماسيالىق جىكتەردىڭ جاعدايى، جابىننىڭ كونسترۋكتيۆتىك ەرەكشەلىكتەرى جانە پايدالانۋ شارتتارى اتالدى. الەمدىك تاجىريبەدە جول قىزمەتتەرى ىستىق كەزەڭدەردە باقىلاۋدى كۇشەيتىپ، الدىن الۋ شارالارىن جۇرگىزەدى: پليتالاردىڭ ىشكى كەرنەۋىن جەدەل الىپ تاستايدى، ۋاقىتشا نەمەسە تۇراقتى اسفالتبەتون جابىندارىن سالادى، قوزعالىستى رەتتەيدى جانە ەڭ جۇكتەلگەن ۋچاسكەلەردى تەكسەرەدى.
قازاقستاندا جول ۇيىمدارى سەمەنتبەتون جولدارىنىڭ جاعدايىن تاۋلىك بويى باقىلاپ وتىر. انىقتالعان اقاۋلار جەدەل تارتىپپەن نورماتيۆتىك تەحنولوگيالىق شەشىمدەر قولدانىلىپ جويىلادى. جاعداي كولىك مينيسترلىگىنىڭ تۇراقتى باقىلاۋىندا. بۇعان دەيىن ۇقساس ماسەلەلەر استانا — ششۋچينسك، استانا — پاۆلودار جانە شىمكەنت — وزبەكستان شەكاراسى تراسسالارىندا بايقالعان.