استانادا رەسەيدەن فيتوسانيتارلىق تالاپتاردى بۇزىپ اكەلىنگەن دەكوراتيۆتى وسىمدىكتەر پارتياسى انىقتالىپ، جويىلدى، دەپ حابارلايدى infohub.kz.
اۋىل شارۋاشىلىعى مينيسترلىگىنىڭ حابارلاۋىنشا، دەكوراتيۆتى وسىمدىكتەرگە ەكسپورتتاۋشى ەلدىڭ كارانتين جانە وسىمدىك قورعاۋ جونىندەگى ۇلتتىق ۇيىمى بەرەتىن مىندەتتى فيتوسانيتارلىق سەرتيفيكات بولماعان. وسى فاكتى بويىنشا زاڭدى تۇلعاعا قاتىستى وسىمدىكتەر كارانتينى سالاسىنداعى زاڭنامانى بۇزعانى ءۇشىن اكىمشىلىك ءىس قوزعالدى.
«فيتوسانيتارلىق قاۋىپسىزدىك تالاپتارىنا سايكەس جۇك يەسىنە انىقتالعان بۇزۋشىلىقتى جويۋ تۋرالى نۇسقاما بەرىلدى. مەنشىك يەسى ۇستالعان ءونىمدى ورتەۋ ارقىلى جويۋ تۋرالى شەشىم قابىلدادى»، — دەپ اتاپ ءوتتى ۆەدومستۆودا. اۋىل شارۋاشىلىعى مينيسترلىگى بەلگىلەنگەن تالاپتاردىڭ ساقتالۋى اۋىل شارۋاشىلىعى مەن قورشاعان ورتاعا زيان كەلتىرۋى مۇمكىن ءقاۋىپتى كارانتيندىك نىسانداردىڭ اكەلىنۋى مەن تارالۋىنىڭ الدىن الۋعا باعىتتالعانىن ەسكەرتتى.