ءۇندىستاننىڭ استاناسى دەليدە وقۋ عيماراتى قۇلاپ، ونداعان ادام، نەگىزىنەن ستۋدەنتتەر، قيراندى استىندا قالدى. بۇل تۋرالى infohub.kz سايتى حابارلايدى.
قۇلاعان عيمارات ستۋدەنتتەر جاتاقحاناسى رەتىندە پايدالانىلعان. جەكسەنبى كۇنى ساباق بولماعاندىقتان، ستۋدەنتتەردىڭ كوبى بولمەلەرىندە بولعان دەپ بولجانۋدا. وقيعا ورنىندا بولعان زاڭ شىعارۋشى اسسامبلەيا مۇشەسىنىڭ ايتۋىنشا، قيراندى استىندا قالعان ستۋدەنتتەردىڭ كەيبىرى تەلەفون ارقىلى قوڭىراۋ شالىپ، كومەك سۇراپ جاتقان.
كۋاگەرلەردىڭ جەرگىلىكتى باق-قا حابارلاۋىنشا، جاتاقحانانىڭ قاسىنداعى تاعى ءبىر عيمارات تا قۇلاعان. دەلي باس ءمينيسترى رەكحا گۋپتا كورشىلەس عيماراتتىڭ «ساقتىق شاراسى رەتىندە» ەۆاكۋاسيالانعانىن، قامالىپ قالعانداردى قۇتقارۋ ءۇشىن بارلىق مۇمكىندىك جاسالىپ جاتقانىن مالىمدەدى.
دەلي پوليسياسىنىڭ مالىمەتىنشە، قۇلاعان عيمارات نەبارى 40-50 جىل بۇرىن سالىنعان. جاقىن ماڭداعى دۇكەن يەسىنىڭ ANI اگەنتتىگىنە ايتۋىنشا، عيمارات 100 جىلدىق جالعا بەرىلگەن، ال جالعا الۋشى كىرىستى ارتتىرۋ ءۇشىن جەرتولەدە قازبا جۇمىستارىن جۇرگىزگەن. «ولار جوعارعى بولىگىن نىعايتقانىمەن، تومەنگى تىرەكتەر ءالسىز بولعان»، — دەدى ول، قۇرىلىس جۇمىسشىلارىنىڭ دا قيراندى استىندا قالعانىن اتاپ ءوتتى.
ءۇندىستان ۇلتتىق ستۋدەنتتەر وداعى ۇكىمەتتى قۇلاۋ سەبەبىن تەرگەپ، كىنالىلەردى جاۋاپقا تارتۋعا شاقىردى. وداق مالىمدەمەسىندە «ستۋدەنتتەر مەن قاراپايىم ادامداردىڭ قاۋىپسىزدىگىنە نەمقۇرايلى قاراۋعا ەشقانداي جاعدايدا جول بەرىلمەيدى» دەلىنگەن. Times of India حابارلاۋىنشا، پوليسيا عيمارات يەسىن ىزدەستىرىپ جاتىر.