25 جىلدان كەيىن قازاقستان «دەموگرافيالىق قارتايۋ» ەلىنە اينالۋى مۇمكىن: بولجام بويىنشا، ءاربىر بەسىنشى تۇرعىن 60 جاستان اسقان بولادى، دەپ حابارلايدى infohub.kz سايتى.
ءبىرىڭعاي جيناقتاۋشى زەينەتاقى قورى (بجزق) بۇۇ دەرەكتەرىنە نەگىزدەلگەن دەموگرافيالىق بولجامداردى جاريالادى. ستاتيستيكاعا سايكەس، 2025 جىلعى 1 قاڭتارداعى جاعداي بويىنشا قازاقستان حالقى 20،5 ميلليون ادامدى قۇرادى. ونىڭ 47،5%-ى (9،73 ميلليون) 25 پەن 65 جاس ارالىعىندا بولسا، 9،6%-ى (1،9 ميلليون) 65 جاستان اسقان. 2050 جىلعا قاراي حالىق سانى 26،5 ميلليون ادامعا دەيىن وسەدى دەپ كۇتىلۋدە.
ءومىر ءسۇرۋ ۇزاقتىعىنىڭ ارتۋى مەن تۋۋ كورسەتكىشىنىڭ تومەندەۋى ەگدە جاستاعى ازاماتتار ۇلەسىنىڭ وسۋىنە جانە ەڭبەككە جارامدى حالىقتىڭ زەينەتكەرلەرگە قاتىناسىنىڭ تومەندەۋىنە اكەلەدى. بۇۇ مەن بجزق بولجامدارى بويىنشا، 2050 جىلعا قاراي 60 جاستان اسقان قازاقستاندىقتاردىڭ ۇلەسى 18،8%-عا جەتەدى، بۇل حالىقارالىق جىكتەمە بويىنشا «دەموگرافيالىق قارتايۋدىڭ وتە جوعارى دەڭگەيىنە» سايكەس كەلەدى.
جۇمىس ىستەيتىندەرگە جۇكتەمە دە ارتادى: ەگەر 2025 جىلى 65 جاستان اسقان ءبىر ادامعا 4،95 ەڭبەككە جارامدى ازامات كەلسە، 2050 جىلى بۇل كورسەتكىش 3،42-گە دەيىن تومەندەيدى. وسىلايشا، جۇكتەمە 1،4 ەسەدەن استام ارتادى.
بجزق مۇنداي جاعدايدا جيناقتاۋشى زەينەتاقى جۇيەسىنىڭ ماڭىزى ارتاتىنىن اتاپ وتەدى. بۇل جۇيە بولاشاق زەينەتاقىنى قىزمەتكەر مەن جۇمىس بەرۋشىنىڭ جارنالارى ەسەبىنەن قالىپتاستىرادى، بيۋدجەتكە ۇزاق مەرزىمدى مىندەتتەمەلەر جۇكتەمەيدى جانە زەينەتاقى جۇيەسىنىڭ تۇراقتىلىعىن قامتاماسىز ەتەدى.
بۇعان دەيىن زەينەتاقى اننۋيتەتىن پايدالانىپ، ەڭ تومەنگى جەتكىلىكتىلىك شەگىن نولگە دەيىن تومەندەتىپ، كەيىن جيناقتارىن الىپ جاتقان قازاقستاندىقتار بولاشاقتا تابىستارىنىڭ ايتارلىقتاي تومەندەۋىنە تاپ بولۋى مۇمكىن ەكەندىگى حابارلانعان بولاتىن.