جامبىل وبلىستىق سوتى «ەۆرازيا» بۇرىنعى كينوتەاترى عيماراتىن بولشەكتەۋ شارتى بويىنشا قارىز جانە تۇراقسىزدىق ايىبىن ءوندىرۋ تۋرالى ءىس بويىنشا اپەللياسيانى قارادى. ناتيجەسىندە سوت القاسى ءبىرىنشى ساتىداعى سوتتىڭ شەشىمىن وزگەرتىپ، جاۋاپكەرشىلىك تەك ازامات ە.-گە جۇكتەلدى، دەپ حابارلايدى infohub.kz.
ءىس ماتەريالدارىنا سايكەس، تاراپتار اراسىندا عيماراتتى بولشەكتەۋگە 40 ملن تەڭگە تۇراتىن شارت جاسالعان. كەيىن ە. كەلىسىلگەن سومادان تىس 10،4 ملن تەڭگە العانىن راستاپ، اقشانى بەلگىلەنگەن مەرزىمدە قايتارۋعا مىندەتتەنىپ، ءوز قولىمەن قولحات جازعان.
الايدا مىندەتتەمە ورىندالمادى. وسىدان كەيىن ە. قولحاتتى الداۋ ارقىلى جازعانىن ايتىپ، ونى جارامسىز دەپ تانۋدى تالاپ ەتىپ، قارسى تالاپ-ارىز بەردى. سوت قولحاتتىڭ ەرىكتى تۇردە جاسالعانىن، ال الداۋ نەمەسە ماجبۇرلەۋ دالەلدەنبەگەنىن انىقتادى.
باستاپقىدا جامبىل اۋداندىق سوتى تالاپ-ارىزدى تولىعىمەن قاناعاتتاندىرىپ، قارىز سوماسى مەن تۇراقسىزدىق ايىبىن ەكى جاۋاپكەردەن دە ءوندىرىپ، قارسى تالاپ-ارىزدى قابىلدامادى. جاۋاپكەرلەر بۇل شەشىمگە شاعىمدانىپ، اپەللياسيادا ازاماتتىق ىستەر جونىندەگى سوت القاسى جك «ب»-عا قويىلعان تالاپتاردى قاناعاتتاندىرۋدان باس تارتتى. قالعان بولىگىندە شەشىم وزگەرىسسىز قالدىرىلدى: ازامات ە.-دەن 10،4 ملن تەڭگە قارىز جانە مەملەكەتتىك باج ءوندىرىلدى. قارسى تالاپ-ارىز تۇپكىلىكتى قابىلدانبادى.
سوت اكتىلەرى زاڭدى كۇشىنە ەندى.