جوعارى اۋديتورلىق پالاتا تەكسەرگەننەن كەيىن دەنساۋلىق ساقتاۋ مينيسترلىگى وزىنە قاراستى 37 ينستيتۋت، ورتالىق جانە مەديسينالىق جوعارى وقۋ ورنىنىڭ عىلىمي تيىمدىلىگىنە ىشكى باعالاۋ جۇرگىزدى. قورىتىندىسى بويىنشا ءبىر ينستيتۋت عىلىمي ۇيىم مارتەبەسىنەن ايىرىلۋى مۇمكىن، دەپ حابارلايدى infohub.kz سايتى.
مەكەمەلەر پاتەنت سانى، سىلتەمە جاسالۋ جيىلىگى جانە ءوز زەرتتەۋلەرىنەن تابىس تابۋ قابىلەتى بويىنشا تەكسەرىلدى.
اۋديت قورىتىندىسى بويىنشا ب.ۋ. دجاربۋسىنوۆ اتىنداعى ۋرولوگيا عىلىمي ورتالىعىنا تومەن كورسەتكىشتەردى تۇزەۋ ءۇشىن 2026 جىلدىڭ سوڭىنا دەيىن ۋاقىت بەرىلدى — ايتپەسە ول عىلىمي ۇيىم مارتەبەسىنەن ايىرىلۋى مۇمكىن.
ترانسفۋزيولوگيا ورتالىعىنىڭ (قان قىزمەتى) مارتەبەسى ساقتالدى، ويتكەنى ول ەلدەگى جالعىز بەيىندى ورتالىق، الايدا ونىڭ قارجىلىق ينديكاتورلارى قايتا قارالادى.
جالپى العاندا، بارلىق عىلىمي مەديسينالىق مەكەمە باسشىلارىنا گرانتتارمەن جۇمىستى كۇشەيتۋ، پاتەنت سانىن ارتتىرۋ جانە ءوز ازىرلەمەلەرىن كوممەرسيالاندىرۋ تاپسىرىلدى.
ەندى مەديسينالىق جوعارى وقۋ ورىندارى مەن عىلىمي-زەرتتەۋ ينستيتۋتتارىنىڭ جەتىستىكتەرىن مونيتورينگتەۋ ءۇشىن ارنايى سيفرلىق پلاتفورما قۇرىلادى.
جوعارى اۋديتورلىق پالاتانىڭ قالعان نۇسقامالارىنىڭ ورىندالۋى باقىلاۋدا قالاتىنى اتاپ ءوتىلدى.
ەسكە سالايىق، بۇل پروسەستىڭ باستالۋىنا جوعارى اۋديتورلىق پالاتا 2025 جىلى جۇرگىزگەن مەملەكەتتىك اۋديت نەگىز بولدى. سوندا تەكسەرۋ قورىتىندىسى بويىنشا دەنساۋلىق ساقتاۋ مينيسترلىگىنە سالا ۇيىمدارىنىڭ عىلىمي، عىلىمي-تەحنيكالىق جانە يننوۆاسيالىق قىزمەتىن جان-جاقتى تالداپ، قاجەت بولسا شارا قولدانۋ تاپسىرىلدى.
بۇعان دەيىن «كۋرسيۆ» كوكشەتاۋدا بەس قالالىق ەمحانا مەن ستاسيونار كوشەتىن مەگا-اۋرۋحانا سالىنىپ جاتقانىن جازعان. جوبا 76%-عا دايىن، ىسكە قوسۋ 2027 جىلى جوسپارلانۋدا. مۇندا مەديسينا قىزمەتكەرلەرى ءۇشىن 1،5 مىڭ جۇمىس ورنى اشىلادى.