«يگرا پرەستولوۆ» كۋلتتى سەريالىنداعى پودريك پەين رولىمەن جانە «قارا اينا» جوباسىمەن تانىمال شوتلانديالىق اكتەر دەنيەل پورتمان قازاقستاننىڭ وڭتۇستىك استاناسىنا كەلدى. ول AGGE Festival 2026 پوپ-مادەنيەت فەستيۆالىنىڭ باستى حەدلاينەرلەرىنىڭ ءبىرى اتاندى، دەپ حابارلايدى infohub.kz سايتى.
ونەر يەسى قازاقستاندا بىرنەشە كۇن بولعانىن جانە وسى ۋاقىت ىشىندە ءوزىن وتە جايلى سەزىنگەنىن ايتتى.
«مەن مۇندا بىرنەشە كۇن بولدىم جانە الەمنىڭ ەشبىر جەرىندە ءوزىمدى بۇلايشا قۇرمەتتى قوناق سەزىنگەن ەمەسپىن. وسى ءۇشىن سىزدەرگە راحمەت»، — دەدى پورتمان.
اكتەر ءداستۇرلى تاعامداردى باعالاپ، ۇلتتىق دەليكاتەستەر — بەشبارماق، ايران، قىمىز، قۇرت جانە ىرىمشىكتى ءدام تارتتى. ونىڭ ايتۋىنشا، تاعامدار وعان اسا ۇنادى، سونداي قۇنارلى تۇسكى اسقا وتىرعان سوڭ ءوزىن شىنىمەن كۇشتى سەزىنگەن.
پورتمان سونداي-اق ۋيليام شەكسپيردىڭ شىعارماسىنداعى شوتلانديا كورولى ماكبەتتى ويناۋدى ارماندايتىنىن ايتتى. ونىڭ سوزىنشە، ءقازىر ول وسى ءرولدى جۇزەگە اسىرا الاتىن جاسقا جەتكەن.
اكتەر «يگرا پرەستولوۆ» ءتۇسىرىلىمى وعان يندۋستريادان تىس ادامدار تۇسىنبەيتىن بىرەگەي تاجىريبە سىيلاعانىن ايتتى. وسىنىڭ ارقاسىندا اكتەرلەر اراسىندا بەرىك دوستىق ورنادى. پورتمان الفي اللەنمەن (تەون گرەيدجوي)، گۆەندولين كريستيمەن (بريەننا تارت) جانە دجەروم فليننمەن (برونن) جىلى قارىم-قاتىناستا.
«ءبىز بارلىعىمىز مادەني فەنومەنگە اينالعان شوۋدىڭ ءبىر بولىگى بولعانىمىزعا وتە باقىتتىمىز»، — دەپ اتاپ ءوتتى ول.
اكتەر سونداي-اق «يگرا پرەستولوۆ» سەريالىندا قايتا تىرىلتكىسى كەلەتىن كەيىپكەردى اتادى. ول دجەيسون موموا سومداعان كحال دروگو بولدى. پورتماننىڭ پىكىرىنشە، دروگو وزىندىك «دجوكەر» ەدى، ەگەر كەيىپكەر ءتىرى قالسا، سەريال وقيعالارى مۇلدە باسقاشا ءوربۋى مۇمكىن ەدى.
پورتمان «يگرا پرەستولوۆ» سەريالىندا پودريك پەين ءرولىن 2012 جىلدان 2019 جىلعا دەيىن سومدادى. ونىڭ كەيىپكەرى تيريون لاننيستەردىڭ قارۋ ۇستاۋشىسى رەتىندە باستالىپ، ۋاقىت وتە سەريالدىڭ تانىمال قوسالقى كەيىپكەرلەرىنىڭ بىرىنە اينالدى.
بۇعان دەيىن Kursiv LifeStyle «يگرا ۆ كالمارا» جانە «كورولەۆا ءسلوز» سەريالدارىمەن تانىمال وڭتۇستىككورەيالىق اكتەر پاك سون حۋننىڭ الماتىعا كەلگەنىن جازعان ەدى. ول قالا تۋرالى العاشقى اسەرلەرىمەن جانە جەرگىلىكتى تاعامدارمەن ءبولىستى.