قازاقستاندا ينتەرندەردى دايارلاۋ مەن جۇمىسقا ورنالاستىرۋدى جوعارى وقۋ ورنى، كلينيكا جانە بولاشاق دارىگەر اراسىنداعى ءۇشجاقتى كەلىسىمشارت جۇيەسىنە كوشىرۋ جوسپارلانۋدا. ءتيىستى بۇيرىق جوباسىن دەنساۋلىق ساقتاۋ مينيسترلىگى اشىق نقا پورتالىندا جاريالادى، دەپ حابارلايدى infohub.kz سايتى.
قۇجاتقا سايكەس، جاڭا تەتىك مەملەكەتتىك تاپسىرىستىڭ اشىقتىعىن قامتاماسىز ەتۋگە، جاس مامانداردى قولداۋعا جانە وڭىرلەردەگى مەديسينالىق كادرلار تاپشىلىعىن جويۋعا باعىتتالعان. سونىمەن قاتار، ول جاس دارىگەرلەردىڭ پاسيەنتتەرمەن جۇمىس ىستەۋگە بەيىمدەلۋىنە كومەكتەسۋى ءتيىس.
«ءبىلىم بەرۋ ۇيىمى، جۇمىس بەرۋشى جانە ينتەرن-دارىگەر اراسىنداعى ءۇشجاقتى كەلىسىمشارت تەتىگى ءار تاراپتىڭ جاۋاپكەرشىلىگىن الدىن الا ايقىنداۋعا، ساپالى وقىتۋدى قامتاماسىز ەتۋگە، جاس ماماندى جۇمىسقا ورنالاستىرۋ كەزىندە قولداۋ كورسەتۋگە جانە مەملەكەتتىك تاپسىرىس بويىنشا مىندەتتەمەلەردى ءتيىمدى ورىنداۋعا مۇمكىندىك بەرەدى»، – دەلىنگەن تۇسىندىرمەدە.
بۇيرىق جوباسى سونداي-اق «ينتەرن-دارىگەر» ۇعىمىن رەسمي بەكىتۋدى كوزدەيدى. دەنساۋلىق ساقتاۋ مينيسترلىگىنىڭ پىكىرىنشە، بۇل بولاشاق ماماننىڭ مارتەبەسىن، ونىڭ قۇقىقتارى مەن مىندەتتەرىن ناقتى ايقىنداۋعا، سونداي-اق وقۋ جانە پراكتيكالىق دايارلىق پروسەسىن بارىنشا اشىق ەتۋگە مۇمكىندىك بەرەدى.
بۇعان دەيىن دەنساۋلىق ساقتاۋ مينيسترلىگى مەديسينالىق جوعارى وقۋ ورىندارىنداعى ورىندار سانى جەرگىلىكتى اۋرۋحانالار مەن ەمحانالاردىڭ ناقتى سۇرانىستارىنا قاراي ەسەپتەلەتىن جاڭا قاعيدالاردى دايىنداعان بولاتىن. تار مامانداردىڭ سىني تاپشىلىعى بايقالاتىن وڭىرلەرگە ەرەكشە ءمان بەرىلەدى. جاڭاشىلدىقتىڭ باستى ماقساتى – ماماندار دايارلاۋدى جوسپارلاۋدىڭ ءبىرىڭعاي جۇيەسىن قۇرۋ ەكەندىگى اتاپ ءوتىلدى.
وعان دەيىن «كۋرسيۆ» قازاقستاندا دارىگەرلىك قاتەلىكتەردى بارىنشا ازايتۋعا كومەكتەسەتىن ساراپتامالىق مەديسينالىق ورتالىقتار جۇيەسىن ەنگىزۋ جوسپارلانىپ جاتقانىن جازعان بولاتىن.