2027 жылдың 1 қаңтарынан бастап Қазақстанда дәрілік заттар мен медициналық бұйымдардың айналымын бақылау жүйесі өзгеруі мүмкін: Денсаулық сақтау министрлігі оларды сатуға қадағалауды күшейтуді ұсынып отыр, деп хабарлайды infohub.kz сайты.
Ведомствоның баспасөз қызметі түсіндіргендей, жаңа шаралар азаматтарды сапасыз және тіркелмеген препараттардан қорғауға, сондай-ақ дәрі-дәрмектің дәріханалар, маркетплейстер, әлеуметтік желілер мен басқа да алаңдар арқылы заңсыз саудасын жедел тоқтатуға бағытталған.
Осы мақсатта Денсаулық сақтау министрлігі мен Ұлттық экономика министрлігінің бірлескен бұйрық жобасы әзірленді. Құжат дәрілік заттар мен медициналық бұйымдар айналысы саласындағы тәуекел дәрежесін бағалау критерийлері мен тексеру парақтарына өзгерістер енгізуді көздейді.
«Ұсынылып отырған өзгерістер мемлекеттік бақылау мен қадағалаудың тиімділігін арттыруға бағытталған, әсіресе анықталған бұзушылықтар халықтың өмірі мен денсаулығына қауіп төндіруі мүмкін жағдайларда», — деп хабарлады ведомствода.
Тиісті лицензиясыз дәрілік заттарды сатуға; тіркелмеген, жалған және сапасыз препараттарды өткізуге; құрамында есірткі, психотроптық және күшті әсер ететін заттар бар дәрілік заттарды дәрігер рецептісіз беруге; фармацевтикалық қызметке қойылатын міндетті талаптардың сақталмауына ерекше назар аудару жоспарлануда.
Осындай бұзушылықтар анықталған жағдайда уәкілетті орган заңнамада көзделген шараларды қолдана алады, оның ішінде қызметті уақытша тоқтата тұру, жекелеген препараттарды өткізуге тыйым салу немесе оларды айналымнан алып қою.
Сонымен қатар дәріханаларды, фармацевтикалық ұйымдарды және нарықтың басқа да қатысушыларын профилактикалық тексеруді жоспарлау тәсілі жетілдірілуде. Тәуекел дәрежесін айқындау кезінде бұрын анықталған бұзушылықтар, тексеру нәтижелері, мемлекеттік органдардың мәліметтері, тергеу нәтижелері және белгіленген талаптардың сақталуын бағалауға мүмкіндік беретін өзге де ақпарат ескеріледі.
«Осылайша, бақылау шаралары ең алдымен қызметінде азаматтардың қауіпсіздігі мен денсаулығына әсер етуі мүмкін бұзушылық белгілері бар ұйымдарға бағытталады. Бұл мемлекеттік бақылау ресурстарын тиімдірек пайдалануға және нарықтың адал қатысушыларына артық жүктемені азайтуға мүмкіндік береді», — деп хабарлады Денсаулық сақтау министрлігінде.
Фармацевтикалық нарықтың адал қатысушылары үшін мемлекеттік бақылауды жетілдіру ашық әрі бірыңғай жұмыс жағдайларын қалыптастыруға ықпал етсе, халық үшін дәрі-дәрмек сатып алу кезінде қосымша қорғаныс қамтамасыз етіледі.
Бірлескен бұйрық жобасы мемлекеттік бақылау мен қадағалау саласындағы заңнаманы жетілдіру аясында әзірленді. Ұсынылып отырған өзгерістерді енгізу 2027 жылдың 1 қаңтарынан бастап жоспарлануда.