قازاقستاننىڭ دەنساۋلىق ساقتاۋ مينيسترلىگى وندىرىستە الىنعان جاراقاتتاردىڭ اۋىرلىق دارەجەسىن انىقتاۋ ەرەجەلەرىنە وزگەرىستەر ەنگىزەتىن بۇيرىق جوباسىن قوعامدىق تالقىلاۋعا ۇسىندى. قۇجاتتا دارىگەرلەر قورىتىندى شىعارعان كەزدە ەسكەرۋگە ءتيىس فاكتورلار تىزبەسى بەلگىلەنگەن — زاقىمدانۋ سيپاتىنان ومىرگە تونەتىن ءقاۋىپ پەن مۇگەدەكتىك قاۋپىنە دەيىن، دەپ حابارلايدى infohub.kz سايتى.
جوباعا سايكەس، وندىرىستىك جاراقاتتىڭ اۋىرلىعىن باعالاۋ كەزىندە ماماندار زارداپ شەككەن ادامنىڭ جاعدايى تۋرالى كلينيكالىق دەرەكتەردى، سونداي-اق دياگنوستيكا مەن ەمدەۋدىڭ مەديسينالىق ستاندارتتارىن باسشىلىققا الۋعا مىندەتتى.
اۋىرلىق دارەجەسىن انىقتاۋدىڭ نەگىزگى ولشەمشارتتارى: الىنعان زاقىمدانۋلاردىڭ سيپاتى مەن دارەجەسى (سىنىقتار، كۇيىكتەر، ىشكى اعزالاردىڭ زاقىمدانۋى، باس سۇيەك-مي جاراقاتتارى جانە ت.ب.)؛ ومىرگە تىكەلەي ءقاۋىپتىڭ بولۋى؛ ەڭبەككە ۋاقىتشا قابىلەتسىزدىك كەزەڭىنىڭ ۇزاقتىعى؛ جالپى نەمەسە كاسىبي ەڭبەككە قابىلەتتىلىكتىڭ تۇراقتى جوعالۋى؛ اۋرۋحاناعا جاتقىزۋ، حيرۋرگيالىق ارالاسۋ نەمەسە رەانيماسيالىق شارالار قاجەتتىلىگى؛ جاراقاتتىڭ سالدارى (ساۋىعۋ، مۇگەدەكتىك نەمەسە ءولىم).
ۆەدومستۆونىڭ ايتۋىنشا، ەرەجەلەردى جاڭارتۋ مەديسينالىق كومەك ساپاسىن ارتتىرۋعا، دەنساۋلىق ساقتاۋ جۇيەسىنىڭ رەسۋرستارىن ءتيىمدى پايدالانۋعا جانە قازاقستاننىڭ حالىقارالىق ستاندارتتارعا سايكەس دامۋىن جالعاستىرۋعا مۇمكىندىك بەرەدى.
قۇجاتتى تالقىلاۋ اعىمداعى جىلدىڭ 19 تامىزىنا دەيىن جالعاسادى.
بۇعان دەيىن «كۋرسيۆ» 2025 جىلى قازاقستانداعى جۇمىس ورىندارىندا 2 328 ادام زارداپ شەككەنىن، ونىڭ 184ء-ى ولىممەن اياقتالعانىن حابارلاعان. 2024 جىلى 2 471 ادام جاراقات العان.