كۇز باستالعالى قازاقستاندا جەدەل رەسپيراتورلىق ۆيرۋستىق ينفەكسيانىڭ 51 937 جاعدايى تىركەلدى. بۇل وتكەن جىلدىڭ وسى كەزەڭىمەن سالىستىرعاندا 1،8 ەسەگە از. تۇماۋ جاعدايى ازىرگە تىركەلگەن جوق، ەلدە بۇرىن بەلگىسىز جاڭا رەسپيراتورلىق ۆيرۋستار دا انىقتالعان جوق، دەپ حابارلايدى infohub.kz سايتى.
دەنساۋلىق ساقتاۋ مينيسترلىگىنىڭ ءباسپاسوز قىزمەتى حابارلاعانداي، ۆەدومستۆو قىركۇيەكتەن باستاپ جرۆي، تۇماۋ جانە COVID-19 اۋرۋلارىنا اپتا سايىن مونيتورينگ جۇرگىزىپ وتىر.
«دەنساۋلىق ساقتاۋ مينيسترلىگى قىركۇيەكتەن باستاپ جرۆي، تۇماۋ جانە COVID-19 اۋرۋلارىنا اپتا سايىن مونيتورينگ جۇرگىزىپ كەلەدى. قىركۇيەك باستالعالى ەلدە ءجرۆي-دىڭ 51 937 جاعدايى تىركەلدى. بۇل وتكەن جىلدىڭ وسى كەزەڭىمەن سالىستىرعاندا 1،8 ەسەگە از. تۇماۋ جاعدايى ازىرگە تىركەلگەن جوق. COVID-19 بويىنشا دا تومەندەۋ بايقالادى. 2026 جىلدىڭ باسىنان بەرى كوروناۆيرۋستىق ينفەكسيانىڭ 87 جاعدايى تىركەلدى — بۇل 2025 جىلدىڭ وسى كەزەڭىمەن سالىستىرعاندا 10،3 ەسەگە از»، — دەدى ۆەدومستۆودا.
سونىمەن قاتار COVID-19 باسقا دا ماۋسىمدىق رەسپيراتورلىق ۆيرۋستارمەن قاتار اينالىمدا ءجۇر. قازاقستاندا بۇرىن بەلگىسىز جاڭا ۆيرۋستار انىقتالعان جوق.
«كۇزدە رەسپيراتورلىق ينفەكسيالاردىڭ تارالۋى ءداستۇرلى تۇردە كۇشەيەدى. دەنساۋلىق ساقتاۋ مينيسترلىگى ەلدەگى ەپيدەميولوگيالىق احۋالدى اپتا سايىن باقىلاۋدى جالعاستىرۋدا»، — دەدى مينيسترلىكتە.
جرۆي، تۇماۋ جانە باسقا دا رەسپيراتورلىق ينفەكسيالاردىڭ الدىن الۋ ءۇشىن قازاقستاندىقتارعا مىنالار ۇسىنىلادى: ءۇي-جايدى ءجيى جەلدەتۋ؛ قولدى ءجيى جۋىپ، جەكە گيگيەنا ەرەجەلەرىن ساقتاۋ؛ مۇمكىندىگىنشە اۋرۋ بەلگىلەرى بار ادامدارمەن تىعىز قارىم-قاتىناستان اۋلاق بولۋ؛ اۋرۋ كوبەيگەن كەزەڭدە ادام كوپ جينالاتىن جەرلەرگە بارماۋ؛ جوتەلگەندە جانە تۇشكىرگەندە اۋىز بەن مۇرىندى مايلىقپەن نەمەسە شىنتاقتىڭ ىشىمەن جابۋ؛ قىزۋ، جوتەل، تاماق اۋرۋى جانە باسقا دا اۋرۋ بەلگىلەرى پايدا بولسا، ۇيدە قالىپ، دەر كەزىندە مەديسينالىق كومەككە جۇگىنۋ.
قاراپايىم پروفيلاكتيكا شارالارىن ساقتاۋ ماۋسىمدىق رەسپيراتورلىق ينفەكسيالاردى جۇقتىرۋ جانە تاراتۋ ءقاۋپىن ازايتۋعا كومەكتەسەتىنى اتاپ ءوتىلدى.
ەسكە سالايىق، وسى اپتانىڭ باسىندا استانا تۇرعىندارى الەۋمەتتىك جەلىلەردە ءبىرتۇرلى بەلگىلەرى بار سىرقاتتان زارداپ شەگىپ جاتقانىن شاعىمداندى — جوتەلدەن بولەك، ازاماتتار اۋىزدىڭ قۇرعاۋىن جانە كوزدىڭ قىشۋىن بايقاعان.