قازاقستاندا قازان ايىنان باستاپ پاسيەنتتەردىڭ دارىگەرگە قانشالىقتى وڭاي قابىلداۋعا بارا الاتىنى جاپپاي تەكسەرىلەدى. بۇل شاراعا دەنساۋلىق ساقتاۋ ءمينيسترى اقمارال ءالنازاروۆانىڭ ادامدار بوس كەستە بولسا دا ۋچاسكەلىك جانە بەيىندىك دارىگەرلەرگە جازىلا الماي جاتقانىنا نارازىلىعى سەبەپ بولدى، دەپ حابارلايدى infohub.kz سايتى.
«ادام پوليكلينيكاعا بارىپ، دارىگەرگە جازىلا الماسا، قانداي مەديسينالىق كومەكتىڭ قولجەتىمدىلىگى تۋرالى ايتۋعا بولادى؟ بۇل — جەرگىلىكتى جەردە قامتاماسىز ەتىلۋى ءتيىس قاراپايىم دۇنيەلەر»، — دەدى دەنساۋلىق ساقتاۋ مينيسترلىگىنىڭ باسشىسى.
مەديسينالىق باقىلاۋ كوميتەتىنىڭ جەتەكشىسى لاۋرا احمەتنيازدىڭ ايتۋىنشا، تەكسەرۋ پاسيەنتتەرگە ءوز بەتىنشە قابىلداۋعا جازىلۋ ءالى دە قيىن ەكەنىن كورسەتتى. پوليكلينيكالارداعى دارىگەرلەردىڭ جۇمىس كەستەسى جاسالعانىمەن، تەراپەۆتەر مەن تار ماماندارعا بوس جازىلۋ ءىس جۇزىندە ءجيى جابىق نەمەسە قولجەتىمسىز بولىپ شىعادى.
«ماسەلە تەك كەستەنىڭ بولۋىندا ەمەس، پاسيەنتتىڭ ءوز بەتىنشە قابىلداۋعا جازىلۋ مۇمكىندىگىندە. انىقتالعان كەمشىلىكتەر بويىنشا مەديسينالىق ۇيىمدارعا ۇسىنىمدار جىبەرىلەدى»، — دەدى احمەتنياز.
ايتا كەتەيىك، كەلەسى ايدان باستاپ پوليكلينيكالارداعى دارىگەرگە جازىلۋ جاعدايى اپتاسىنا ەكى رەت باقىلانادى.
ءوز كەزەگىندە ءالنازاروۆا وڭىرلەردىڭ دەنساۋلىق ساقتاۋ باسقارمالارىنا بۇل ماسەلەنى تۇراقتى باقىلاۋعا الۋدى تاپسىردى. ول دەنساۋلىق ساقتاۋ جۇيەسى قازاقستاندىقتارعا ونلاين دا، وفلاين دا قولجەتىمدى بولۋى كەرەكتىگىن اتاپ ءوتتى.
«دارىگەرگە جازىلۋ مۇمكىندىگى — بۇل جەرگىلىكتى جەردەگى بۇكىل دەنساۋلىق ساقتاۋ جۇيەسىنىڭ كۇندەلىكتى جۇمىسى»، — دەدى مينيستر.
تامىز ايىنىڭ سوڭىندا «كۋرسيۆ» بىرنەشە جىل قاتارىنان تومەن ناتيجە كورسەتىپ كەلە جاتقان پوليكلينيكالاردى قارجىلاندىرۋ تاسىلدەرى قايتا قارالاتىنىن جازعان بولاتىن.