قازاقستاندا دارى-دارمەكتىڭ مەملەكەتتىك باعاسىن رەتتەۋ ەرەجەلەرى قايتا قارالىپ، ءدارىحانا سورەلەرىندەگى باعا ارزاندادى: شەكتى باعا 3 801 ءدارى اتاۋىنا، ياعني جالپى ءتىزىمنىڭ 76%-ىنا تومەندەتىلدى. 2025 جىلى ورتا ەسەپپەن 26،5%-عا ارزانداسا، 2026 جىلى دا ءدارى باعاسىنىڭ تومەندەۋى تىركەلدى، دەپ حابارلايدى infohub.kz سايتى.
دەنساۋلىق ساقتاۋ مينيسترلىگىنىڭ مالىمەتىنشە، 947 دارىلىك پرەپاراتتىڭ باعاسى وزگەرىسسىز قالدى، ال ءتىزىم 246 جاڭا اتاۋمەن تولىقتى.
اعىمداعى جىلعا كەلسەك، 2026 جىلدىڭ باسىنان بەرى كوتەرمە جانە بولشەك ساۋداعا ارنالعان 2055 ءدارىنىڭ جاڭا باعاسى بەكىتىلدى. وسى كەزەڭدە باعا 16%-عا تومەندەدى.
ارزانداۋ تەگىن مەديسينالىق كومەكتىڭ كەپىلدەندىرىلگەن كولەمى (تمككك) جانە مىندەتتى الەۋمەتتىك مەديسينالىق ساقتاندىرۋ (ءمامس) اياسىندا بەرىلەتىن پرەپاراتتارعا دا قاتىستى. مۇندا 1 397 ساۋدا اتاۋى بويىنشا، ياعني 47،8%-عا باعانىڭ تومەندەۋى تىركەلدى.
سونداي-اق تمككك جانە ءمامس اياسىندا دارىلىك زاتتاردىڭ حالىقارالىق پاتەنتتەلمەگەن اتاۋلارىنا شەكتى باعالار قايتا قارالدى. 453 پوزيسيا بويىنشا باعا تومەندەدى.
فارماسيا كوميتەتىنىڭ ءتوراعاسى باۋىرجان ءجۇسىپوۆتىڭ ايتۋىنشا، بۇل ناتيجەلەر شەكتى باعانى قالىپتاستىرۋ تاسىلدەرىن قايتا قاراۋمەن بايلانىستى.
«بۇگىندە ءوندىرۋشى مالىمدەگەن قۇن قۇجاتپەن راستالىپ، رەفەرەنتتى ەلدەردەگى باعالارمەن سالىستىرىلادى. بۇل رەتتە ءۇش ەڭ تومەن باعانىڭ ورتاشا ءمانى پايدالانىلىپ، دەرەكتەر حالىقارالىق كوزدەردەگى اقپاراتپەن قوسىمشا راستالادى. مۇنداي ءتاسىل ءدارىنىڭ مالىمدەلگەن قۇنىن نەعۇرلىم وبەكتيۆتى باعالاۋعا جانە شەكتى باعانى قالىپتاستىرۋعا مۇمكىندىك بەرەدى»، – دەدى ءجۇسىپوۆ.
قازىرگى تاڭدا قازاقستاننىڭ رەفەرەنتتىك سەبەتىنە ءازىربايجان، بەلارۋس، بولگاريا، ۆەنگريا، قىرعىزستان، پولشا، رەسەي فەدەراسياسى، سلوۆەنيا، تۇركيا جانە وزبەكستان كىرەدى.
بۇعان دەيىن «كۋرسيۆ» قازاقستاندىق ءدارىحانالاردا 589 فارمپرەپاراتتىڭ باعاسى تومەندەگەنىن جازعان بولاتىن. ەڭ كوپ ارزانداعانى – انتيبيوتيكتەر، سونداي-اق جۇرەك-قان تامىرلارى جانە اسقازان-ىشەك اۋرۋلارىنا قارسى دارىلەر.