تۇركىستان وبلىسى اۋداندىق ءماسليحاتىنىڭ دەپۋتاتى ەرعالي امانبايەۆ بۇرىن «777» نومىرىمەن Lexus كولىگىن جۇرگىزىپ، جول ەرەجەسىن بۇزعان سكاندالمەن تانىمال بولسا، ەندى ونى جۇڭگو ازاماتشاسىن زورلادى دەپ كۇدىكتەيدى، دەپ حابارلايدى NUR.KZ سايتى.
Halyqstan Telegram-ارناسىنىڭ مالىمەتىنشە، بايدىبەك اۋداندىق پوليسيا بولىمىنە الماتى تۇرعىنىنان ارىز تۇسكەن. ونىڭ ايتۋىنشا، ول بايجانساي اۋىلىنا قىتايدان كەلگەن ءتورت تانىسىمەن — وسى وڭىردەگى قورعاسىن-مىرىش كەنىن وندىرۋگە قىزىعۋشىلىق تانىتقان الەۋەتتى ينۆەستورلارمەن — بىرگە كەلگەن. قوناقتاردى دەپۋتات ەرعالي امانبايەۆ قارسى الىپ، ەرتىپ ءجۇرىپ، كەيىن ولارعا دەمالىس ۇيىمداستىرعان.
دەپۋتاتتىڭ قوناقجايلىلىعى شەكتەن شىققان. ايەلدىڭ نۇسقاسى بويىنشا، امانبايەۆ 34 جاستاعى جۇڭگو ازاماتشاسىن ءوزىنىڭ بۇرىن شىمكەنتتە ءقاۋىپتى مانەۆرلەر جاساعان Lexus كولىگىنە وتىرعىزىپ، ەلسىز جەرگە اپارىپ، ونىمەن ەرىكسىز جىنىستىق قاتىناسقا تۇسكەن.
تۇركىستان وبلىسى پوليسيا دەپارتامەنتىنىڭ NUR.KZ تىلشىسىنە حابارلاۋىنشا، وسى فاكتى بويىنشا سوتقا دەيىنگى تەرگەۋ جۇرگىزىلۋدە. كۇدىكتى — شىمكەنت تۇرعىنى — انىقتالىپ، قاماۋعا الىندى. قازىرگى ۋاقىتتا بارلىق ءمان-جايلاردى انىقتاۋ ءۇشىن قاجەتتى شارالار جۇزەگە اسىرىلۋدا. تەرگەۋ قورىتىندىسى بويىنشا قولدانىستاعى زاڭناما اياسىندا ءتيىستى شەشىم قابىلدانادى. ۆەدومستۆونىڭ ءباسپاسوز قىزمەتى ق ر قپك-نىڭ 201-بابىنا سايكەس تەرگەۋ مۇددەسىنە بايلانىستى وزگە اقپاراتتى جاريا ەتپەيتىنىن مالىمدەدى.
ەسكە سالايىق، بىلتىر تامىز ايىندا شىمكەنتتە «ادەمى ءنومىرلى» (ءۇش جەتى) Lexus جۇرگىزۋشىسىنىڭ جول ەرەجەسىن بۇزعان ۆيدەوسى جەلىدە تاراعان ەدى. پايدالانۋشىلار كادردان تۇركىستان وبلىسى بايدىبەك اۋدانى ءماسليحاتىنىڭ دەپۋتاتى ەرعالي امانباەۆتى تانىدى. شىمكەنت پوليسيا دەپارتامەنتى جۇرگىزۋشىنىڭ ق ر اقبتك-نىڭ بىرنەشە بابى بويىنشا: جالعان تىركەۋ نومىرىمەن كولىك جۇرگىزۋ، قارسى باعىتتا ءجۇرۋ، مىندەتتى ساقتاندىرۋدىڭ بولماۋى، قاۋىپسىزدىك بەلدىگىن تاقپاۋ، تىيىم سالىنعان جەرلەردە كەرى ءجۇرۋ، سونداي-اق باعىت بەلگىسىن بەرمەۋدى قامتيتىن جول قوزعالىسى ەرەجەسىنىڭ تالاپتارىن ورىنداماۋ فاكتىلەرى بويىنشا جاۋاپكەرشىلىككە تارتىلعانىن حابارلادى. ناتيجەسىندە دەپۋتات 4 تاۋلىككە قامالىپ، ءبىر جىلعا كولىك جۇرگىزۋ قۇقىعىنان ايىرىلدى. الايدا ونىڭ ارىپتەستەرى ونىڭ مىنەز-قۇلقى دەپۋتاتتىق ەتيكا نورمالارىنا قايشى كەلمەيدى دەپ شەشتى.