قازاقستان مەن قىرعىزستاننىڭ حالىق ءارتىسى ديماش قۇدايبەرگەننىڭ «اكەركە» جاڭا ءانى 30 شىلدەدە جاپونيانىڭ Kiryu FM راديوسىندا تۇڭعىش رەت ورىندالادى. بۇل تۋرالى infohub.kz سايتى حابارلادى.
ءانشىنىڭ شىعارماشىلىعىنا ارنالعان Music Forever باعدارلاماسىنىڭ ارنايى شىعارىلىمى جاپوندىق Dimash Japan Fan Club فان-كلۋبىنىڭ قاتىسۋىمەن دايىندالدى. ەفيردە «اكەركە»-دەن بولەك، Love’s Not Over Yet، Kieli Meken، Love of Tired Swans، Daididau، Omir جانە Olimpico كومپوزيسيالارى شىرقالادى.
Kiryu FM راديوسى 2020 جىلدان بەرى جاپوندىق تىڭدارمانداردى ديماشتىڭ مۋزىكاسىمەن تانىستىرىپ، ونىڭ بارلىق جاڭا تۋىندىلارىن تۇراقتى تۇردە ەفيرگە قوسىپ كەلەدى. Music Forever باعدارلاماسى گۋمما پرەفەكتۋراسىنداعى كيريۋ قالاسىنان تاراتىلادى، ونى كازۋدزي كاتو مەن كوكو ياماموتو جۇرگىزەدى. ەفيرلەر ايىنا ەكى رەت — ءار ايدىڭ ءبىرىنشى جانە ءۇشىنشى بەيسەنبىسىندە جاپون ۋاقىتىمەن 19:06-دان 19:59-عا دەيىن (استانا ۋاقىتىمەن 15:06-دان 15:59-عا دەيىن) وتەدى، كەلەسى كۇنى قايتالانادى.
بۇعان دەيىن ديماشتىڭ اپكەسى راۋشان جاڭا انگە ارنالعان چەللەندجگە قوسىلدى: «اكەركە» انىنە بيلەپ، الەۋمەتتىك جەلىگە جاريالاۋ كەرەك. ەڭ كوپ قارالىم جيناعان بەينەروليكتىڭ اۆتورى ءانشىنىڭ كەلەسى كليپىنە تۇسەدى.