قاراعاندىداعى كەنشىلەر كۇنىنە ارنالعان ۇلكەن كونسەرتتە ونەر كورسەتكەن الەمگە ايگىلى قازاقستاندىق ءانشى ديماش قۇدايبەرگەن Qarmet كومپانياسىنىڭ كوستەنكو اتىنداعى شاحتاسىنا باردى، دەپ حابارلايدى infohub.kz سايتى.
ساپار بارىسىندا ءانشى كاسىپورىننىڭ جۇمىسىمەن تانىسىپ، جەر استىنا 700 مەتر تەرەڭدىككە ءتۇسىپ، پەرسونالدىڭ ورنالاسۋىن ناقتى ۋاقىت رەجيمىندە باقىلاۋعا مۇمكىندىك بەرەتىن پوزيسيالاۋ جۇيەسىنىڭ جۇمىسىن كوردى.
«قاراعاندىداعى كەنشىلەر كۇنىنە ارنالعان ۇلكەن كونسەرتتەن كەيىن (شامامەن 250 مىڭ ادام جينالدى) Qarmet كومپانياسىنىڭ كوستەنكو اتىنداعى شاحتاسىندا بولدىم. جەر استىنا 700 مەتر تەرەڭدىككە ءتۇسىپ، شاحتەرلەردىڭ قانداي جاعدايدا جۇمىس ىستەيتىنىن، بۇل قانشالىقتى قيىن ءارى جاۋاپتى ەڭبەك ەكەنىن ءوز كوزىممەن كوردىم. ماعان شاحتانىڭ جۇمىسىن، ادامداردىڭ جەر استىنداعى ورنىن باقىلاۋعا مۇمكىندىك بەرەتىن زاماناۋي قاۋىپسىزدىك جانە پوزيسيالاۋ جۇيەلەرىن كورسەتتى. شاحتالاردىڭ جاڭعىرىپ جاتقانى قۋانتادى. ءبىراق ەڭ باستىسى — شاحتەرلەرمەن جۇزدەسىپ، ولاردى كاسىبي مەرەكەمەن قۇتتىقتاۋ مۇمكىندىگى بولدى. بۇل ماماندىق يەلەرىنە زور قۇرمەت. سىزدەردىڭ ەڭبەكتەرىڭىز ەرەكشە قۇرمەتكە لايىق! كەنشىلەر كۇنى قۇتتى بولسىن! مىقتى دەنساۋلىق، اماندىق جانە ءقاۋىپسىز اۋىسىمدار تىلەيمىن! راحمەت، Qarmet!» — دەدى ءانشى.
ءانشى ءۇشىن بۇل ساپار زاماناۋي جەر استى ءوندىرىسى مەن قاۋىپسىزدىك تەحنولوگيالارىن عانا ەمەس، سونىمەن قاتار جۇزدەگەن مەتر تەرەڭدىكتە كۇن سايىن ەڭبەك ەتەتىن ادامداردىڭ ەڭبەگىن كورۋگە مۇمكىندىك بولدى.
كوستەنكو اتىنداعى شاحتاعا بارۋ شاحتەرلىك ەڭبەككە جانە قاراعاندى ءوڭىرىنىڭ كومىر سالاسىنىڭ تۇراقتى جۇمىسىن قامتاماسىز ەتەتىن ادامدارعا دەگەن قۇرمەتتىڭ تاعى ءبىر بەلگىسى بولدى.