قازاقستاندىق ءانشى ديماش قۇدايبەرگەننىڭ قارىنداسى راۋشان اعاسى ۇيىمداستىرعان چەللەندجگە قاتىسىپ، ونىڭ جاڭا «اكەركە» انىنە فرانسياداعى مون-سەن-ميشەل ارالىندا بيلەدى، دەپ حابارلايدى infohub.kz.
كاسىپكەر قۇدايبەرگەن ۇيىمداستىرعان بايقاۋدى قولدادى. شارت بويىنشا «اكەركە» انىنە بيلەيتىن بەينەروليك ءتۇسىرىپ، الەۋمەتتىك جەلىگە جاريالاۋ كەرەك. ەڭ كوپ قارالىم جيناعان جەڭىمپاز ءانشىنىڭ كەلەسى بەينەبايانىنا ءتۇسۋ مۇمكىندىگىنە يە بولادى.
«مەن بايقاۋعا قاتىسپايمىن، ءبيشى ەمەسپىن، ءبىراق اعاما قولداۋ كورسەتۋ — مەنىڭ پارىزىم. ۋاقىت از قالدى، چەللەندجگە ۇلگەرىڭىزدەر»، — دەپ جازدى راۋشان بەينەروليكتىڭ سيپاتتاماسىندا. ول ءتۇسىرىلىم 40 گرادۋس ىستىقتا وتكەنىن ايتىپ، جازىلۋشىلاردان بي شەبەرلىگىن قاتاڭ باعالاماۋدى ءوتىندى. بەينەروليك مون-سەن-ميشەل ارالىنداعى ورتاعاسىرلىق موناستىر فونىندا تۇسىرىلگەن.
بەينەروليك 43 مىڭنان استام لايك جينادى. پايدالانۋشىلار تۇسىنىكتەمەلەردە راۋشاندى ماقتاپ، ونى جەڭىمپاز دەپ اتايدى. «ديماشتىكىندەي چەللەندج شىقتى، جارايسىڭ، راۋشان»، «اعاسىنىڭ وتباسى ءارقاشان قولدايدى. ول مۇنى كەرەمەت، زاماناۋي جانە ءداستۇرلى ەتىپ جاسادى»، «تاماشا! ديماشتىڭ جاڭا بەينەبايانىندا مىندەتتى تۇردە راۋشان تۇسەدى جانە ءدال وسى جەردە!» — دەپ ءتانتى بولدى جازىلۋشىلار.
ديماشتىڭ ءوزى بەينەروليككە «سۇيىكتى قارىنداسىم، جۇرەگىم» دەپ پىكىر ءبىلدىردى.
بۇعان دەيىن ديماش قۇدايبەرگەن قازاق حالىق ءانى «اكەركەنىڭ» وڭدەۋىنە ارنالعان جاڭا بەينەبايانىنىڭ كادرلارىن كورسەتىپ، وندا ءقاۋىپتى تريۋك بولعانى حابارلانعان ەدى.