قازاقستاندىق ءانشى ديماش قۇدايبەرگەن جانكۇيەرلەرىن جاڭا مۋزىكالىق سىيىمەن قۋانتتى: ول تۇرىك تىلىندەگى ءانىن شىعاردى، ءانىنىڭ مۋزىكاسىن ءوزى جازدى، دەپ حابارلايدى infohub.kz.
ءارتىس الەمنىڭ تۇكپىر-تۇكپىرىندەگى بارلىق جانكۇيەرلەرىنە كوپ جىلعى قولداۋلارى ءۇشىن العىس ءبىلدىردى. ونىڭ ايتۋىنشا، تۇرىك تىلىندەگى جاڭا ءانىنىڭ مۋزىكاسىن ول ءوزى جازعان. «ءبىزدى بالا كەزىمىزدەن ءانشى ءوز كورەرمەنىنىڭ سۇيىسپەنشىلىگىنە بولەنۋى كەرەك دەپ ۇيرەتتى. ءبىراق ماعان بۇل كورەرمەن كەيدە الەمنىڭ ەكىنشى شەتىندە بولاتىنىن ەشكىم ايتپادى. سوندىقتان بۇگىن مەنىڭ تۇرىك تىلىندەگى جاڭا ءتول ءانىم "Yazgı" شىعادى. سوڭعى 10 جىل بويى ءارقاشان جانىمدا بولعان بارلىق قىمباتتى جانكۇيەرلەرىمە راحمەت. ءدال سىزدەردىڭ ارقالارىڭدا مەن جۇمىسىمدى جالعاستىرىپ كەلەمىن. كەلەسى ءانىمدى قاي تىلدە تىڭداعىلارىڭ كەلەدى؟ داۋىس بەرىڭىزدەر، مەن سىزدەردىڭ تىلەكتەرىڭىزدى ەستىگىم كەلەدى»، — دەدى ءانشى جانكۇيەرلەرىنە.
ءار ەلدەردەن كەلگەن جانكۇيەرلەر بۇل جاڭالىققا بەلسەندى تۇردە جاۋاپ بەردى. «ادەمى اۋەن! ءبىز يسپان تىلىندە جاڭا ءان سۇرايمىز»، «ال مەن تاعى تۇرىك تىلىندە تىڭدار ەدىم»، «بىزگە قانداي تاماشا سىيلىق»، «ديماش، سەن كەرەمەتسىڭ»، «مۋزىكانىڭ جۇرەكتە سەزىنۋ ءۇشىن كەدەرگىسى، شەكاراسى، ءتىلى جوق»، — دەپ جازدى ولار پىكىرلەردە.