قازاقستاندىق ءانشى ديماش قۇدايبەرگەن تۇرىك تىلىندەگى اۆتورلىق انىمەن جانكۇيەرلەرىن قۋانتقاننان كەيىن، كەلەسى ترەك جوسپارىن اشتى، دەپ حابارلايدى infohub.kz سايتى.
ءارتىس Instagram-دا جانكۇيەرلەرىنە ۇندەۋ جاساپ، قولداۋلارى ءۇشىن العىس ءبىلدىردى: ونىڭ "Yazgı" ءانى iTunes-تا بىردەن ءۇش ەلدە — ۆەنگريا، رۋمىنيا جانە لاتۆيادا ءبىرىنشى ورىنعا شىقتى. ول بولاشاق ءاننىڭ ءتىلى تۋرالى سۇراعاندا، لاتىن امەريكاسى، يسپانيا جانە باسقا دا يسپان ءتىلدى ەلدەردەگى تىڭدارمانداردىڭ ەرەكشە بەلسەندىلىگىن بايقاعانىن اتاپ ءوتتى.
"مەن سىزدەردى ەستىدىم — كەلەسى ءان يسپان تىلىندە بولادى! مەن بارلىق جانكۇيەرلەرىمدى جاقسى كورەمىن جانە باعالايمىن. سىزدەر — ءبىر ۇلكەن مۋزىكالىق وتباسىسىزدار، جانە ءارقايسىڭىز مەنىڭ جۇرەگىمدە ەرەكشە ورىن الاسىزدار"، — دەپ جازدى ديماش، يسپان تىلىندەگى ءسوزدى قوسىپ: "جاقىندا كەزدەسكەنشە! مەن سىزدەردى قاتتى جاقسى كورەمىن!".
الەمنىڭ تۇكپىر-تۇكپىرىنەن كەلگەن جانكۇيەرلەر بۇل جاڭالىققا قۋانا قارسى الدى. "ۆاۋ، يسپان تىلىندەگى ءان! راحمەت، ديماش!"، "كەلەسى ءاندى پورتۋگال تىلىندە ايتىڭىزشى، وتىنەمىن"، "قازىرگى سەزىمىمدى ايتىپ جەتكىزۋگە ءسوز جەتپەيدى. ءسىزدىڭ داۋىسىڭىزدى انا تىلىمدە تىڭداۋ، ءار ءسوزدى ءتۇسىنۋ جانە ولاردىڭ ارتىنداعى ەموسيالاردى سەزىنۋ — بۇل وتە تەرەڭ، بۇل شىندىققا جاناسپايتىنداي كورىنەدى"، "بۇل كەرەمەت جاڭالىقتان تاڭعالىپ تۇرمىن"، "ءسىزدىڭ مۋزىكاڭىز قاي تىلدە شىرقالسا دا، ول ءارقاشان ەرەكشە سۇلۋلىققا يە بولادى" — دەگەن پىكىرلەر قالدىردى جانكۇيەرلەر.
بۇعان دەيىن ديماشتىڭ تۇرىك تىلىندەگى ءانى شەتەلدەگى iTunes حيت-پارادتارىنىڭ جوعارعى ساتىلارىن جاۋلاپ جاتقانى حابارلانعان بولاتىن.