ديماش قۇدايبەرگەننىڭ جانكۇيەرلەرى ونىڭ DIMENSIONS الەمدىك تۋرىنا قىزۋ دايىندالىپ، اقپاراتتىق جانە شىعارماشىلىق شارالار وتكىزۋدە. ولار قازاقستاندىق ءانشىنىڭ ونەرىن جەرلەستەرىنە تانىستىرۋدى ماقسات ەتكەن، دەپ حابارلايدى infohub.kz سايتى.
DIMENSIONS تۋرىنىڭ باستالۋىنا ءبىر ايدان ءسال استام ۋاقىت قالدى، الايدا جانكۇيەرلەر سۇيىكتى ءانشىسىن زور قۋانىشپەن قارسى الۋعا ءازىر. قازاقستاندىق ءارتىس 18 قازاندا كراكوۆتە العاشقى كونسەرتىن بەرەدى. كونسەرت قارساڭىندا پولياك جانكۇيەرلەرى ەكى كۇندىك اكسيا وتكىزدى. «اشىق كراكوۆ» باعدارلاماسىنىڭ 10 جىلدىعىنا ارنالعان پيكنيكتە ولار قالا تۇرعىندارىن قازاقستانمەن، ديماشپەن جانە ونىڭ ونەرىمەن تانىستىردى. ال ەكىنشى كۇنى فان-كلۋب مۇشەلەرى كراكۋس قورعانىنان كراكوۆتىڭ باستى الاڭىنا دەيىن ءجۇرىپ ءوتىپ، سۇيىكتى ءانشىسىنىڭ الداعى كونسەرتى تۋرالى اقپاراتتىق ماتەريالدار تاراتتى.
كونسەرت قارساڭىنداعى اۋقىمدى اقپاراتتىق ناۋقان يسپانيادا دا باستالدى. ديماش مۇندا 30 قازاندا ونەر كورسەتەدى. ناۋقان 16 ماۋسىمدا باستالعان. جەرگىلىكتى فان-كلۋب مۇشەلەرىنىڭ ماقساتى — قازاقستاندىق ءانشىنىڭ شىعارماشىلىعىن كەڭ اۋديتورياعا تانىستىرۋ، سونداي-اق ديماشتىڭ يسپانياداعى ەكىنشى جەكە كونسەرتى تۋرالى حابارلاۋ. بۇگىندە ناۋقانعا 150-دەن استام دۇكەن مەن وزگە مەكەمە قوسىلدى، ولاردىڭ سانى ارتىپ كەلەدى.
لاتىن امەريكاسىندا دا سۇيىكتى ءانشىسىن كۇتۋدە. ءانشى 24 قاراشادا چيليدە كونسەرت بەرەدى. كونسەرتكە بيلەتتەر ساتىلىپ كەتكەن. سانتياگونىڭ باستى كوشەلەرىنىڭ بىرىندەگى ۇلكەن سيفرلىق ەكراندا ديماشقا ارنالعان ارنايى قۇتتىقتاۋ پايدا بولدى. بۇل باستامانى ديماشتىڭ جانكۇيەرلەرىنىڭ ءبىرىنىڭ ۇلى قولعا العان. اناسىنىڭ قازاقستاندىق ءانشىنىڭ ونەرىن جاقسى كورەتىنىن بىلەتىن جارناما سالاسىندا جۇمىس ىستەيتىن جىگىت سيفرلىق قۇتتىقتاۋ ۇيىمداستىرۋدى شەشتى. حابارلاما شىققان ساتتە ەكران الدىنا چيلي فان-كلۋبىنىڭ وكىلدەرى جينالىپ، اسىعا كۇتكەن وقيعانىڭ جاقىنداعانىن اتاپ ءوتتى.
وسىلايشا، الداعى الەمدىك تۋر ديماشتىڭ ءار ەلدەگى جانكۇيەرلەرىن بىرىكتىردى. ولاردىڭ بارلىعى انشىمەن كەزدەسۋدى اسىعا كۇتىپ، جەرلەستەرىنە ول تۋرالى جانە قازاقستان تۋرالى ايتىپ ءجۇر.