تەلەجۇرگىزۋشى دينارا ءساتجان اقتوبەدەگى ەمشى باعداگۇلگە قاتىستى سوتقا تالاپ ارىز بەرگەنىن حابارلادى. ونىڭ ايتۋىنشا، بۇل ءىس بويىنشا العاشقى سوت وتىرىسى استانادا ءوتتى، دەپ حابارلايدى infohub.kz سايتى.
دينارا ءساتجاننىڭ سوزىنشە، اتالعان ەمشى الەۋمەتتىك جەلىدە ونىڭ ار-نامىسى مەن ابىرويىنا نۇقسان كەلتىرەتىن مالىمدەمەلەر جاساپ، بالاعات سوزدەر ايتقان. وسىعان بايلانىستى ول داۋدى قۇقىقتىق جولمەن شەشۋدى ءجون كورگەن.
«ءسوز بوستاندىعى – كونستيتۋسيامەن كەپىلدەندىرىلگەن قۇقىعىمىز. ءبىراق ول وزگەنى قورلاۋ ەركىندىگىن بىلدىرمەيدى. ءسوز بوستاندىعى – ايتىلعان ءسوز ءۇشىن جاۋاپكەرشىلىك تە»، – دەپ جازدى تەلەجۇرگىزۋشى.
ول ءبىر اي بۇرىن اقتوبەدەگى ەمشىگە قارسى سوتقا تالاپ-ارىز بەرگەنىن، ال بۇگىن استانادا العاشقى سوت وتىرىسى وتكەنىن حابارلادى.
«ءوزىڭدى قورعاۋ – جانجالقوي بولۋ دەگەن ءسوز ەمەس. سوندىقتان باعداگۇل ايتقان سوزدەرى ءۇشىن TikTok-تا ەمەس، سوت الدىندا جاۋاپ بەرەدى»، – دەدى دينارا ءساتجان.
سونداي-اق ول ءىس بويىنشا ءوز مۇددەسىن قورعايتىن ادۆوكاتىنا العىس ايتىپ، بارلىق داۋلار زاڭ اياسىندا شەشىلۋى ءتيىس ەكەنىن اتاپ ءوتتى.