فرانسيانىڭ باتىسىندا بولعان جول-كولىك وقيعاسىندا Dior Couture كومپانياسىنىڭ PRء-بولىمىنىڭ باسشىسى ماتيلدا فاۆە مەن بەلگىلى كينوپروديۋسەر نيكوليا التمايەر قازا تاپتى، دەپ حابارلايدى infohub.kz.
اپات ەرۆو كوممۋناسىنداعى D938 تراسساسىندا بولدى. پروكۋراتۋرانىڭ مالىمەتىنشە، ولاردىڭ Mini كولىگى قارسى باعىتتا كەلە جاتقان جۇك كولىگىمەن سوقتىعىسقان. جۇپ كابۋردان فاۆەنىڭ رە ارالىنداعى ۇيىنە بەت العان.
Dior كومپانياسى فاۆەنىڭ قازاسىن راستادى. Christian Dior Couture باس ديرەكتورى دەلفين ارنو كوڭىل ايتىپ، بىلاي دەدى: «ماتيلدا ءومىردى قاتتى جاقسى كوردى. ماتيلدانىڭ قازاسىمەن Dior كەرەمەت ماماننان ايىرىلدى، ال مەن ادال دوسىمنان ايىرىلدىم. ونىڭ ءوپتيميزمى مەن باتىلدىعى ءسۇيسىندىردى. ءبىز ونىڭ كۇلكىسى مەن تالانتىن قاتتى ساعىنامىز».
Dior يەسى LVMH توبىنىڭ پرەزيدەنتى بەرنار ارنو دا كوڭىل ايتىپ، فاۆەنىڭ كوپ جىلدار بويى «ءوز قۇلشىنىسىن، ەنەرگياسىن جانە تالانتىن پايدالانا وتىرىپ، Dior ۇيىنە قىزمەت ەتكەنىن» اتاپ ءوتتى.
Dior كرەاتيۆتى ديرەكتورى دجوناتان اندەرسون ماتيلدا فاۆەنىڭ قازاسىنا «قاتتى قايعىرعانىن» ايتتى. ول: «ءبىز ونىڭ ەڭبەگى مەن ادالدىعى ءۇشىن وعان قارىزدارمىز. ول جىلۋلىق پەن ەنەرگيا تاراتىپ، مەن كەزدەستىرگەن ەڭ ءپوزيتيۆتى جانە شابىتتاندىراتىن ادام بولدى. ماتيلدا ساندىلىكتىڭ بەينەسى جانە كوپ جاعىنان جوعارى ءساننىڭ رۋحى ەدى»، - دەدى.
ماتيلدا فاۆە 56 جاستا ەدى، ول Dior Couture-دە ون جىلدان استام جۇمىس ىستەدى، وعان دەيىن Prada-دا 11 جىل ەڭبەك ەتتى. ول جۇمىس ىستەگەن گولليۆۋد جۇلدىزدارىنىڭ اراسىندا ميشەل يەو، شارليز تەرون، دجەننيفەر لوۋرەنس جانە انيا تەيلور-دجوي بار. ول «ماتيلدا ۆ پاريجە» كىتابىن شىعارىپ، قاتەرلى ىسىكپەن اۋىراتىن ادامدارعا كومەكتەسەتىن «ەستەتيكا ي راك» قاۋىمداستىعىن قۇردى.
61 جاستاعى نيكوليا التمايەر اعاسى ەريك التمايەرمەن بىرگە Mandarin كينوكومپانياسىن باسقاردى. ول فرانسۋا وزوننىڭ، فونكينوس اعايىندىلاردىڭ فيلمدەرىن، «اگەنت 117» فيلمدەر سەرياسىن پروديۋسەرلىك ەتتى. اكتەر پەر نينە تۇسكەن «سەن-لوران» (2014) بايوپيگى كانن فەستيۆالىندە ماراپاتقا يە بولدى.