57 جاستاعى ماتيلدا فاۆە، Dior ءسان ءۇيىنىڭ كوپ جىلعى ءباسپاسوز قىزمەتىنىڭ ديرەكتورى، جول اپاتىنان قايتىس بولدى. ونىمەن بىرگە ونىڭ سەرىكتەسى، 61 جاستاعى فرانسۋز كينووندىرۋشىسى نيكوليا التمايەر دە قازا تاپتى. قايعىلى وقيعا دۇيسەنبى كۇنى بولدى، ال سەيسەنبى، 18 تامىزدا بۇل تۋرالى Dior رەسمي حابارلادى. Vogue دەرەكتەرىنە سۇيەنسەك، كولىكتەر بەتپە-بەت سوقتىعىسقان، دەپ حابارلايدى infohub.kz.
ماتيلدا فاۆە ءوز مانسابىنىڭ 15 جىلىن Dior-گە ارنادى. ول ايەلدەر كوللەكسيالارى بويىنشا حالىقارالىق ءباسپاسوز قىزمەتىنىڭ ديرەكتورى قىزمەتىن اتقاردى جانە برەندتىڭ جۇلدىزدارىمەن تىعىز جۇمىس ىستەدى. ولاردىڭ اراسىندا رياننا، دجەننيفەر لوۋرەنس، ناتالي پورتمان، Blackpink توبىنىڭ دجيسۋ جانە انيا تەيلور-دجوي بار.
فاۆە ءسان الەمىندەگى كورنەكتى تۇلعا بولدى. ونى قىسقا شاشى مەن جارقىن مىنەزىنەن وڭاي تانيتىن. Dior-گە دەيىن ول Chanel، Glamour جانە Prada كومپانيالارىندا جۇمىس ىستەگەن.
2024 جىلى ماتيلدا «پاريجدەگى ادەمى ءومىر» اتتى كىتابىن شىعاردى، وندا ول فرانسيا استاناسىنداعى سۇيىكتى ورىندارىمەن، گاسترونوميالىق تالعامدارىمەن جانە ادەمى ءومىر تۋرالى ويلارىمەن ءبولىستى. الەۋمەتتىك جەلىلەردە ونى 240 مىڭنان استام ادام قاداعالادى.
ماتيلدانىڭ ەكى بالاسى قالدى — قىزى ەلويزا جانە ۇلى كارلو. ونىڭ 23 جاستاعى ۇلى Instagram-دا جۇرەگىنىڭ «سىنىپ قالعانىن» جازدى جانە اناسىن ءومىردىڭ بەينەسى، قۋانىشتىڭ سيمۆولى دەپ اتادى.
ول قايتىس بولعاننان كەيىن ارىپتەستەرى مەن Dior باسشىلىعى وتباسىنا كوڭىل ايتتى. Dior ءتوراعاسى جانە باس ديرەكتورى دەلفين ارنو فاۆەنى كورنەكتى مامان عانا ەمەس، سونىمەن قاتار ءوزىنىڭ ادال دوسى دەپ اتادى.