Disney ستۋدياسى اكتەر ماكولەي كالكينمەن «جالعىز ءۇي» فرانشيزاسىنا ورالۋ تۋرالى كەلىسسوز جۇرگىزىپ جاتىر. جۋرناليست ءارى ينسايدەر مەتت بەللونيدىڭ مالىمەتىنشە، كومپانيا وكىلدەرى ارتىسپەن كەزدەسىپ، ونىڭ جاڭا جوباعا قاتىسۋىن تالقىلاعان، دەپ حابارلايدى infohub.kz.
بەللونيدىڭ ايتۋىنشا، Disney كەۆين ماككاليستەر ءرولىن قايتا جانداندىرۋعا مۇددەلى جانە كالكيننىڭ جالعاسىنا تۇسۋگە كەلىسىمىنىڭ ورنىنا ونىڭ باسقا باستامالارىن قولداۋعا دايىن. جۋرناليست ستۋديادا فيلمگە «وتە جاقسى يدەيا» بار ەكەنىن، بۇل اقپاراتتى كومپانيا ىشىندەگى بىرنەشە دەرەككوز راستايتىنىن ايتادى.
Disney رەسمي تۇردە «جالعىز ءۇيدىڭ» جاڭا ءبولىمىن جاريالاعان جوق جانە كەلىسسوزدەر تۋرالى قاۋەسەتتەرگە تۇسىنىكتەمە بەرمەيدى.
بۇعان دەيىن كالكين كەۆيندى قايتا ويناۋ مۇمكىندىگىن جوققا شىعارماعان بولاتىن. 2025 جىلى اكتەر ءوز كەيىپكەرىن جالعىز بالا تاربيەلەپ وتىرعان ەرەسەك ەر ادام رەتىندە ەلەستەتەتىنىن ايتقان. ونىڭ ويىنشا، ءبىر كۇنى كەۆيننىڭ ءوز ۇلى ونى ۇيدەن قۋىپ شىعادى، بۇل ءتۇپنۇسقا ءفيلمنىڭ سيۋجەتىن قايتالايدى.
ەسكە سالايىق، كالكين بۇعان دەيىن قارت ادامدارعا كۇتىم جاسايتىن Home Instead كومپانياسىنىڭ «ۇيدە، ءبىراق جالعىز ەمەس» جارنامالىق ناۋقانىندا كەۆين ماككاليستەردىڭ بەينەسىن سومداعان ەدى.