«دودو پيسسا» ءوزىنىڭ IT-ينفراقۇرىلىمىنا جاسالعان كيبەراتاكانى رەسمي تۇردە راستادى. ناتيجەسىندە قاسكويلەر كليەنتتەردىڭ ءبىر بولىگىنىڭ جەكە دەرەكتەرىنە قول جەتكىزگەن بولۋى مۇمكىن. بۇل تۋرالى كومپانيا ءوزىنىڭ Telegram-ارناسىندا حابارلادى، دەپ جازادى infohub.kz سايتى.

كومپانيانىڭ حابارلاماسىندا بىلاي دەلىنگەن: «دوستار، كەشە جانە بۇگىن ءبىزدىڭ IT-جۇيەمىزگە كيبەراتاكا جاسالدى. اقپاراتتىق قاۋىپسىزدىك توبى مۇنداي جاعدايدىڭ قايتالانباۋى ءۇشىن قولدان كەلگەننىڭ ءبارىن جاساپ جاتىر. ال ءقازىر كليەنتتەرىمىزدىڭ ءبىر بولىگىنىڭ قانداي دەرەكتەرى قولجەتىمدى بولۋى مۇمكىن ەكەنىن اشىق ايتقىمىز كەلەدى: ءاتى-جونى، مەكەنجايلارى، email، تەلەفوندارى، تۋعان كۇندەرى، تاپسىرىس قۇرامى».

سونىمەن قاتار «دودو پيسسا» كليەنتتەردىڭ تولەم دەرەكتەرى شابۋىلعا ۇشىراعان جۇيەدە ساقتالمايتىنىن، سوندىقتان ولار حاكەرلەردىڭ قولىنا تۇسپەگەنىن مالىمدەدى. «تولەم دەرەكتەرىن ءبىز ساقتامايمىز – ولار ءقاۋىپسىز»، – دەدى كومپانيادا.

بولعان وقيعا تۋرالى روسكومنادزورعا حابارلاندى. «دودو پيسسا» مالىمەتىنشە، قاسكويلەردىڭ جۇيەگە قولجەتىمدىلىگى بۇعاتتالعان، ىشكى تەكسەرۋ جالعاسۋدا. كليەنتتەردى قورعاۋ شارالارىنىڭ ءبىرى – اككاۋنتتاردان ءماجبۇرلى شىعۋ بولدى.

DATASUCKERS حاكەرلىك توبى «دودو پيسسانىڭ» شامامەن 68 ميلليون كليەنتى تۋرالى 2-3 تەرابايت اقپاراتتى، سونىڭ ىشىندە ءارتۇرلى ەلدەردەگى پايدالانۋشىلاردىڭ دەرەكتەرى مەن تاپسىرىس تاريحىن ۇرلاعانىن مالىمدەپ وتىر. بۇل ساندارعا تاۋەلسىز راستاۋ ازىرگە جوق، ال كومپانيانىڭ ءوزى زارداپ شەككەندەردىڭ ناقتى سانىن جاريالاعان جوق.

«دودو پيسسا» قازاقستانداعى پايدالانۋشىلاردىڭ دەرەكتەرى زارداپ شەكتى مە، جوق پا – ونى ناقتىلامادى. الايدا حاكەرلەر جەلى بار بارلىق ەلدەردەگى كليەنتتەر تۋرالى اقپارات العانىن مالىمدەپ وتىر.

Blue Screen سەرۆيسى «دودو پيسسانىڭ» قازاقستاندىق پايدالانۋشىلارىنا كومپانيا اتىنان كەلەتىن قوڭىراۋلارعا، حاتتار مەن حابارلامالارعا ەرەكشە ساق بولۋدى ۇسىنادى. «كۇماندى سىلتەمەلەرگە وتپەڭىز، SMS-كودتار مەن بانك كارتاسىنىڭ دەرەكتەرىن حابارلاماڭىز، ال اككاۋنت ءقۇپياسوزىن اۋىستىرعان ءجون، اسىرەسە ول باسقا سەرۆيستەردە دە قولدانىلسا»، – دەپ كەڭەس بەرەدى ماماندار.

تولەم دەرەكتەرى بولماسا دا، ءاتى-جونى، تەلەفونى، email، مەكەنجايى جانە بۇرىنعى تاپسىرىستارى تۋرالى اقپارات سەنىمدى فيشينگ ءۇشىن پايدالانىلۋى مۇمكىن، دەپ اتاپ ءوتتى سەرۆيس.

Dodo.Brands حالىقارالىق جەلىسى الەمنىڭ 26 ەلىندە، سونىڭ ىشىندە قازاقستان مەن رەسەيدە 1300-دەن استام پيسسەريا مەن كوفەحانانى بىرىكتىرەدى.