نيۋ-يوركتەگى كۆينس اۋدانىندا ورنالاسقان، دونالد ترامپ ءومىرىنىڭ العاشقى ءتورت جىلىن وتكىزگەن ەكى قاباتتى ءۇي ساتىلدى. مامىلە سوماسى 1،93 ملن دوللاردى قۇرادى، ساتىپ الۋشى — اتىن جاريالاماۋدى وتىنگەن جەكە تۇلعا، دەپ حابارلايدى infohub.kz سايتى.
تيۋدور ستيلىندەگى ءۇيدى 1940 جىلى اقش-تىڭ بولاشاق پرەزيدەنتىنىڭ اكەسى، قۇرىلىس سالۋشى فرەد ترامپ تۇرعىزعان. مامىلەنىڭ اياقتالعانى تۋرالى People پورتالى جازدى.
الدىڭعى يەسى، قۇرىلىس سالۋشى توممي لين، قاڭىراپ قالعان عيماراتتى 2025 جىلى نەبارى 835 مىڭ دوللارعا ساتىپ العان. ول كەزدە نىساننىڭ جاعدايى مۇشكىل ەدى: قۇبىرلار جارىلىپ، ىشىندە زەڭ پايدا بولعان، ال بوس بولمەلەردى قاڭعىباس مىسىقتار مەكەندەگەن. ينۆەستور ينتەرەردى تولىق جاڭارتىپ، زاماناۋي اس ءۇي ورناتىپ، پاركەت ەدەندەردى جاڭارتىپ، اۋقىمدى جوندەۋگە شامامەن 500 مىڭ دوللار جۇمسادى.
بۇل تۇرعىن ءۇيدىڭ تاريحى ەرەكشە. 2017 جىلى ءۇي Trump Birth House LLC كومپانياسىنا 2،14 ملن دوللارعا ساتىلىپ، كەيىن Airbnb پلاتفورماسىندا جالعا بەرىلگەن. سول كەزدە بولمەلەرگە ەكس-پرەزيدەنتتىڭ تولىق بويلى كارتون ءمۇسىنى قويىلىپ، ونىڭ سۋرەتتەرى بار جۋرنال مۇقابالارى ىلىنگەن. كەيىنىرەك ءۇيدى 2،9 ملن دوللارعا ساتۋعا ارەكەت جاسالدى، ءبىراق ساتىپ الۋشى تابىلماي، عيمارات جىلدار بويى قاڭىراپ قالدى.