قازاقستاندا قايتىس بولعان دونورلاردىڭ تۋىستارىنا تولەم نەمەسە جەڭىلدىكتەر ەنگىزۋ جوسپارلانباعان، دەپ حابارلايدى infohub.kz سايتى.
رەسپۋبليكادا قايتىس بولعاننان كەيىنگى دونورلىق اقىسىز بولىپ قالادى، سوندىقتان دونورلاردىڭ وتباسىلارىن ماتەريالدىق ىنتالاندىرۋ ماسەلەسى ازىرگە قاراستىرىلمايدى. بۇل تۋرالى ورتالىق كوممۋنيكاسيالار قىزمەتىندەگى بريفينگتە دەنساۋلىق ساقتاۋ مينيسترلىگىنىڭ ترانسپلانتاسيا جانە جوعارى تەحنولوگيالىق مەديسينالىق قىزمەتتەردى ۇيلەستىرۋ رەسپۋبليكالىق ورتالىعىنىڭ ديرەكتورى ايدار سيتكازينوۆ مالىمدەدى.
جۋرناليستەردىڭ قايتىس بولعاننان كەيىنگى دونورلىقتان باس تارتۋ سانىن ازايتۋ ءۇشىن جەڭىلدىكتەر نەمەسە قارجىلىق قولداۋ كورسەتۋ مۇمكىندىگى تۋرالى سۇراعىنا ول: «قازىرگى ۋاقىتتا بۇكىل الەمدە دونورلىق ىزگىلىك پەن الترۋيزم نەگىزىندە تەگىن جانە اقىسىز ەكەنى قابىلدانعان. ءبىز وسى قاعيداتتى ۇستانامىز، سايكەسىنشە، قازىرگى ۋاقىتتا كەلىسىم بەرگەن تۋىستارعا ماتەريالدىق ىنتالاندىرۋ جوق»، — دەپ جاۋاپ بەردى.
قازىرگى ۋاقىتتا تەك العىس حاتتار تۇرىندەگى مورالدىق ىنتالاندىرۋ عانا قاراستىرىلعان. سونداي-اق بريفينگ بارىسىندا شەشىمدى تۋىستار ەمەس قابىلداۋى ءۇشىن قايتىس بولعاننان كەيىنگى دونورلىققا كەلىسىمدى نوتاريالدى كۋالاندىرۋ مۇمكىندىگى تۋرالى سۇراق قويىلدى. سيتكازينوۆ مۇنداي تاجىريبەنىڭ جوقتىعىن ءتۇسىندىردى: «مۇندا تۋىستارىمەن سويلەسۋ كەرەك شىعار، ەڭ بولماعاندا ولاردى ونىڭ كەلىسىم بەرگەنى تۋرالى حاباردار ەتۋ قاجەت. قازىرگى ۋاقىتتا سوڭعى ءسوز ءبارىبىر جاقىن تۋىستاردا قالادى».
سونىمەن قاتار، قازاقستاندا شەتەل ازاماتتارىنا اعزا ترانسپلانتاسياسى قاراستىرىلماعانى حابارلاندى.