قازاقستان ەنەرگەتيكا مينيسترلىگى كاسپي ترۋبوپروۆودتىق كونسورسيۋمىنىڭ (كتك) جۇمىسى قارا تەڭىزدەگى تەڭىز تەرمينالى اۋدانىنداعى ۇشقىشسىز ۇشاق شابۋىلىنا قاراماستان قالىپتى رەجيمدە جالعاسىپ جاتقانىن مالىمدەدى، دەپ حابارلايدى infohub.kz.
ۆەدومستۆونىڭ مالىمەتىنشە، 17 شىلدەدە ۇشقىشسىز ۇشاق شابۋىلىنا كتك تەرمينالىنا مۇناي تيەۋ ءۇشىن بەت العان Nordic Zenith مۇناي تانكەرى ۇشىراعان. شابۋىل كەزىندە كەمە بوس بولعان.
«كەمە ەكيپاجى ءورتتى ءوز كۇشىمەن جەدەل ءسوندىردى. زارداپ شەككەندەر جوق. قازاقستاندىق مۇنايعا ءقاۋىپ جوق»، — دەلىنگەن حابارلامادا.
مينيسترلىك تەرمينالدىڭ تەحنولوگيالىق ينفراقۇرىلىمى اقاۋسىز جۇمىس ىستەپ تۇرعانىن، ال مۇنايدى تانكەرلەرگە تيەۋ ادەتتەگى تارتىپپەن جالعاسىپ جاتقانىن اتاپ ءوتتى.
بۇعان دەيىن Nordic Zenith تانكەرى ەكى رەت تۇنگى ۇشقىشسىز ۇشاق شابۋىلىنان زاقىمدانعانى حابارلانعان. ءورت شىققاننان كەيىن ەكيپاج وتتى ءوز بەتىمەن سوندىرە العانىمەن، كەمە مۇناي تيەۋگە كىرىسە الماعان.
كاسپي ترۋبوپروۆودتىق كونسورسيۋمىندا تانكەردىڭ 17 شىلدە تاڭەرتەڭ تيەۋدى باستاۋى ءتيىس بولعانىن راستادى. وقيعادان كەيىن كەمە جۇك وپەراسيالارىن جۇرگىزۋگە جارامسىز دەپ تانىلىپ، تەرمينالداعى جوسپارلانعان تۇراق كۇشى جويىلعان.
كتك اقپاراتى بويىنشا، SOS سيگنالىن العان سوڭ كونسورسيۋم ماماندارى ەكيپاجدىڭ 13 مۇشەسىن ەۆاكۋاسيالاعان. تاعى توعىز تەڭىزشى كەمە بورتىندا قالۋدى شەشكەن.