پاۆلودار وبلىسىندا تيتان-سيركوني كونسەنتراتىن شىعاراتىن زاۋىت سالىپ جاتقان Druzhba Mining كومپانياسى 2025 جىلدى 83،2 ملن تەڭگە شىعىنمەن اياقتادى، دەپ حابارلايدى infohub.kz سايتى.
قارجىلىق ەسەپتىلىككە سايكەس، كاسىپورىننىڭ ەسەپتى كەزەڭدەگى تابىسى 30،8 ملن تەڭگەنى قۇرادى. بۇل سومانىڭ بارلىعى ءونىم مەن قىزمەتتىڭ وزىندىك قۇنىن جابۋعا جۇمسالعان، ناتيجەسىندە نەگىزگى قىزمەتتەن تۇسكەن كىرىس نولگە تەڭ بولدى.
قارجىلىق ناتيجەگە نەگىزگى قىسىمدى 79،2 ملن تەڭگەگە جەتكەن اكىمشىلىك شىعىندار كورسەتتى. تاعى 4،9 ملن تەڭگە باسقا شىعىندارعا تيەسىلى. وسىلايشا، كومپانيانىڭ وپەراسيالىق شىعىنى وتكەن جىلعى 63 مىڭ تەڭگەمەن سالىستىرعاندا 83،2 ملن تەڭگەنى قۇرادى.
Druzhba Mining 2024 جىلدىڭ جەلتوقسانىندا تىركەلگەن. كومپانيانىڭ جالعىز قاتىسۋشىسى — استانادا تىركەلگەن TZ Group Ltd جەكە كومپانياسى. 2025 جىلدىڭ سوڭىندا كومپانيادا توعىز ادام جۇمىس ىستەدى.
جارعىلىق قۇجاتتارعا سايكەس، Druzhba Mining قاتتى پايدالى قازبالاردى بارلاۋ، ءوندىرۋ جانە وڭدەۋمەن، سونداي-اق گەولوگيالىق بارلاۋ جۇمىستارىمەن اينالىسادى.
بۇعان دەيىن Druzhba Mining پاۆلودار وبلىسىنىڭ مامىر اۋدانىندا تيتان-سيركوني كونسەنتراتىن شىعاراتىن كاسىپورىن سالۋدى جوسپارلاپ وتىرعانى حابارلانعان بولاتىن. جوبانىڭ قۇنى 27 ملرد تەڭگەدەن اسادى دەپ باعالانۋدا. زاۋىت جوبالىق قۋاتقا شىققاننان كەيىن جىلىنا 77 مىڭ توننادان استام ءونىم ءوندىرىپ، شامامەن 200 جۇمىس ورنىن قۇرا الادى.
اشىق تىزىلىمدەردىڭ دەرەكتەرى بويىنشا، TZ Group Ltd يەلەرى يليا يۆاحوۆ پەن Alphatech Investments كومپانياسى بولىپ تابىلادى. سوڭعىسىنىڭ تۇپكى يەلەرى تۋرالى اقپارات قازاقستاندىق بازالاردا اشىلمايدى — كومپانيا شەتەلدە تىركەلگەن.
سونىمەن قاتار، قازاقستاندا اتاۋى ۇقساس AlfaTech Group كومپانياسى جۇمىس ىستەيدى، ونىڭ تەڭ يەلەرىنىڭ ءبىرى — كاسىپكەر سانجار راحمەتجانوۆ. ول ءوز سايتىندا ونەركاسىپتىك ينجينيرينگ جانە سيفرلىق تەحنولوگيالار سالاسىنداعى جوبالاردى دامىتاتىنىن، سونداي-اق ءبىرقاتار حالىقارالىق ينجەنەرلىك جانە تەحنولوگيالىق جوبالارعا قاتىساتىنىن كورسەتەدى.