قازاقستان دەنساۋلىق ساقتاۋ مينيسترلىگى الەۋمەتتىك جەلىلەردە مەديسينالىق جوعارى وقۋ ورىندارىنىڭ تۇلەكتەرى ەمتيحاندى كوپتەپ تاپسىرا الماعانى تۋرالى تاراعان وسەككە قاتىستى رەسمي مالىمدەمە جاسادى، دەپ حابارلايدى infohub.kz.
ۆەدومستۆونىڭ ءباسپاسوز قىزمەتىنىڭ مالىمدەۋىنشە، سوڭعى كۇندەرى الەۋمەتتىك جەلىلەردە رەزيدەنتۋرانىڭ جەكەلەگەن تۇلەكتەرى قورىتىندى اتتەستاسيانىڭ ەكىنشى كەزەڭىنىڭ ناتيجەلەرىنە نارازىلىق بىلدىرگەن. «جاپپاي وتە الماۋ» تۋرالى اقپاراتتى مينيسترلىك قاتاڭ تۇردە جوققا شىعاردى.
قورىتىندى اتتەستاسيا ناتيجەلەرىنە جۇرگىزىلگەن تالداۋ كورسەتكەندەي، تۇلەكتەردىڭ 96،5 پايىزى ەكىنشى كەزەڭنەن ءساتتى وتكەن. ەمتيحان ءراسىمى، تاپسىرمالار مازمۇنى جانە باعالاۋ جۇيەسى قازاقستان رەسپۋبليكاسىنىڭ زاڭناماسىنا تولىق سايكەس كەلگەن. ەكىنشى كەزەڭگە رەزيدەنتۋرانىڭ 3684 تۇلەگى قاتىسىپ، ونىڭ 3540-ى (96،5%) بىلىكتىلىگىن راستادى. شەكتى دەڭگەيدەن 134 تۇلەك (3،5%) وتە المادى، ورتاشا بالل 80،7 بولدى.
ۆەدومستۆو رەزيدەنتۋرانىڭ كوپجىلدىق پراكتيكالىق ەڭبەك ەكەنىن (2 جىلدان 4 جىلعا دەيىن وقۋ) جانە تاپسىرۋشىلاردىڭ جوعارى پايىزى قازاقستاندىق مەديسينالىق جوو مەن كلينيكالىق بازالارداعى دايىندىق ساپاسىنىڭ حالىقارالىق ستاندارتتارعا ساي ەكەنىن دالەلدەيتىنىن اتاپ ءوتتى. سالىستىرۋ ءۇشىن، ۇلىبريتانيادا رەزيدەنتۋرا تۇلەكتەرىنىڭ قورىتىندى ەمتيحاندى ءساتتى تاپسىرۋ كورسەتكىشى شامامەن 60–65 پايىزدى قۇرايدى.
سونداي-اق مەملەكەتتىك تىلدەگى تاپسىرمالاردىڭ ساپاسى بويىنشا جەكە تەكسەرۋ جۇرگىزىلدى. ماتەريالدار ازىرلەنىپ، وزىندىك مازمۇندىق جانە لينگۆيستيكالىق ساراپتامادان وتكەنى انىقتالدى. بەيىمدەۋسىز سوزبە-سوز اۋدارۋ فاكتىلەرى انىقتالمادى.
اقپاراتتىق جۇيەنى تالداۋ كورسەتكەندەي، شەكتى دەڭگەيدەن وتە الماعان تۇلەكتەردىڭ كوپشىلىگى ەمتيحانعا بولىنگەن 90 مينۋتتى تولىق پايدالانباعان. ولاردىڭ ەداۋىر بولىگى جۇمىستى الدەقايدا ەرتە اياقتاپ، جاۋاپتاردى تەكسەرۋ جانە كلينيكالىق جاعداياتتاردى تالداۋ مۇمكىندىگىن پايدالانباعان.
ءاربىر تۇلەك ەمتيحان كەزىندە اقپاراتتىق جۇيە ارقىلى ناقتى تاپسىرمالارعا شاعىم بەرە العان. تۇسكەن بارلىق وتىنىشتەر رەسپۋبليكالىق اپەللياسيالىق كوميسسيادا بەلگىلەنگەن تارتىپپەن قارالۋدا.
مينيسترلىك سىندارلى ديالوگقا اشىق ەكەنىن جانە ءاربىر ءوتىنىشتى زاڭ بويىنشا قاراۋعا دايىن ەكەنىن مالىمدەدى. ۆەدومستۆو قورىتىندى اتتەستاسيا فورمالدىلىق ەمەس، قاجەتتى ءراسىم ەكەنىن، ويتكەنى ەرتەڭ تۇلەكتەر ءوز بەتىنشە كلينيكالىق شەشىمدەر قابىلداپ، دياگنوز قويىپ، ەم تاعايىنداپ، ادامداردىڭ ءومىرى مەن دەنساۋلىعىنا جاۋاپ بەرەتىنىن اتاپ ءوتتى. ناۋقاستار سەرتيفيكات العان ماماننىڭ بىلىكتىلىگىنە سەنىمدى بولۋى ءتيىس.