دۋبايدان يزرايلگە بەت العان جولاۋشىلار ۇشاعى ساۋد ارابياسىنىڭ تابۋك قالاسىنا شۇعىل قونۋعا ءماجبۇر بولدى. سەبەبى ۇشقىشتار اراسىنداعى جانجال بولۋى مۇمكىن دەپ بولجانىپ وتىر، دەپ حابارلايدى infohub.kz سايتى.
يزرايلدىك بۇقارالىق اقپارات قۇرالدارى قاۋىپسىزدىك قىزمەتكەرلەرىنە سىلتەمە جاساپ، سارسەنبى كۇنى بولعان وقيعا ۇشاقتىڭ ەكى ۇشقىشى اراسىنداعى كيكىلجىڭنەن تۋىنداعانىن، بورتىنداعىلاردىڭ بارلىعى امان-ەسەن ەكەنىن جازدى. ۇشاق پاتشالىقتىڭ ازاماتتىق ءارى اسكەري بازاسى سانالاتىن تابۋك قالاسىنا قوندى.
اشىق دەرەككوزدەردەگى ۇشۋ باقىلاۋ اقپاراتىنا قاراعاندا، FlyDubai اۋەكومپانياسىنىڭ ۇشاعى شۇعىل دابىل جىبەرگەن. FlightRadar24 دەرەكتەرى بويىنشا، دۋبايدان ۇشقاننان كەيىن شامامەن ەكى جارىم ساعات وتكەندە ول 33 000 فۋتتان 17 000 فۋتقا دەيىن ءبىر مينۋت ىشىندە كۇرت تومەندەپ، يوردانيا شەكاراسىنا جاقىن جەردە تۇراقسىز شەڭبەر جاساپ، ءبىر ساعاتتان كەيىن تابۋككە قونعان.
وقيعادان حاباردار ايماقتىق شەنەۋنىك ۇشقىشتار كابيناسىندا جانجال شىققانىن، وعان ۇشقىشتاردىڭ قاتىسى بولۋى مۇمكىن ەكەنىن ايتتى. ونىڭ ايتۋىنشا، جانجالدىڭ نەدەن تۋىنداعانى ازىرگە بەلگىسىز.
ەكىنشى شەنەۋنىك ءيزرايلدىڭ ونداعان ازاماتىن تاسىمالداعان ۇشاقتىڭ ۇرلانۋىنان قاۋىپتەنىپ، اسكەري ۇشاقتارىن كوككە كوتەرگەنىن راستادى. يزرايل پرەمەر-مينيسترى بينيامين نەتانياحۋ سوڭعى كۇندەرى ناقتىلالماعان قاۋىپسىزدىك قاتەرلەرىنىڭ كۇشەيگەنى تۋرالى ەسكەرتكەن بولاتىن.
ەكى شەنەۋنىك تە وقيعا ءالى تەرگەلىپ جاتقاندىقتان، ەسىمدەرىن جاسىرۋ شارتىمەن سويلەستى.
نەتانياحۋدىڭ كەڭسەسى كەيىنىرەك جاعدايدىڭ باقىلاۋدا ەكەنىن، يزرايل جولاۋشىلاردى ەلگە قايتارۋ ءۇشىن جۇمىس ىستەپ جاتقانىن مالىمدەدى.
جەكە سەبەپتەرمەن شۇعىل قونۋ سيرەك كەزدەسەدى، ءبىراق مۇلدەم بولمايدى دەۋگە بولمايدى. 2022 جىلى Air France اۋەكومپانياسىنىڭ ەكى ۇشقىشى جەنەۆا–پاريج رەيسىندە كابينادا توبەلەسكەننەن كەيىن جۇمىستان شەتتەتىلگەن ەدى، الايدا ۇشاق باسقا جاققا بۇرىلماي، جوسپارلانعانداي قونعان بولاتىن.
جولاۋشىلار ءيزرايلدىڭ 12-ارناسىنا تەلەفون ارقىلى ۇشاقتىڭ الدىڭعى جاعىندا وتىرعانداردىڭ ۇشقىشتار اراسىنداعى جانجالدى ەستىگەنىن، ولاردىڭ ايقايلاعانىن، سونداي-اق ۇشاقتىڭ ساۋد ارابياسىنا قونۋدىڭ الدىندا كۇرت تومەندەگەنىن ايتتى.
ولار سونداي-اق بارلىق جولاۋشىنىڭ ۇشاق ىشىندە قالىپ جاتقانىن جانە اينالاسىندا ساۋدتىق قاۋىپسىزدىك كۇشتەرىنىڭ كوپ شوعىرلانعانىن جەتكىزدى.
FlyDubai كەيىنىرەك بەن-گۋريون اۋەجايىنا باعىت العان FZ 1073 رەيسىنىڭ وقيعاعا تاپ بولعانىن، سارسەنبى كۇنى تابۋككە امان-ەسەن قونعانىن راستادى.
«ءبىزدىڭ توپتار ءتيىستى ورگاندارمەن تىعىز جۇمىس ىستەپ جاتىر. راستالعان قوسىمشا مالىمەتتەر پايدا بولعان سايىن جاڭا اقپارات بەرىلەتىن بولادى»، — دەدى اۋەكومپانيا.
ۇشۋ باقىلاۋ دەرەكتەرى ۇشاقتىڭ Boeing 737 Max 8 ەكەنىن كورسەتتى.