دۋباي بيلىگى ەميرات تۇرعىندارىنا كەز كەلگەن ەلدەن، ونىڭ ىشىندە قازاقستاننان تۋريستەر شاقىرعانى ءۇشىن سىياقى تولەۋ باعدارلاماسىن ىسكە قوستى. "دۋبايعا شاقىرۋ" باعدارلاماسى ءاربىر شاقىرىلعان قوناق ءۇشىن شامامەن 815 دوللار كولەمىندە سىياقى پاكەتىن قاراستىرادى، دەپ حابارلايدى infohub.kz.
"ۆەدوموستي" باسىلىمىنىڭ مالىمەتىنشە، دۋباي ەكونوميكا جانە تۋريزم دەپارتامەنتى (DET) باعدارلامانىڭ باستالعانىن حابارلادى. تۇسىندىرىلگەندەي، "باستاما شارتتارى بويىنشا، 18 جاستان اسقان، Emirates IDء-سى بار تۇرعىندار دوستارى نەمەسە تۋىستارى تۋرالى مالىمەتتەردى ولار كەلگەنگە دەيىن ونلاين-فورما ارقىلى تىركەيدى. قوناقتار دۋبايعا 2026 جىلعى 20 شىلدە مەن 31 قازان ارالىعىندا اۋە، تەڭىز نەمەسە اۆتوموبيل كولىگىمەن كەلۋى كەرەك، سونداي-اق قولدانىستاعى تۋريستىك ۆيزاسى نەمەسە كەلگەن كەزدە ۆيزا الۋ قۇقىعى بولۋى ءتيىس".
كەلۋشى كەلگەننەن كەيىن جۇيە ونىڭ كەلگەنىن اۆتوماتتى تۇردە راستايدى، ال 72 ساعات ىشىندە تۇرعىن سىياقى پاكەتى بار ەلەكتروندىق حات الادى. ءاربىر نومينالدى پاكەت شامامەن 815 دوللارعا (380 مىڭ تەڭگەدەن استام) باعالانادى. باعدارلاما ۆيزالاردى رەسىمدەۋمەن اينالىسپايدى – بۇل مىندەت قوناقتاردىڭ وزدەرىنە جۇكتەلەدى. باستاما تۇرعىنداردى دۋباي تۋرالى اسەرلەرىمەن بولىسۋگە ىنتالاندىرۋ جانە سونىمەن بىرگە ولاردى قالانى جاقىندارى اراسىندا ناسيحاتتاعانى ءۇشىن ماراپاتتاۋعا ارنالعان.
Euronews حابارلاۋىنشا، ەميرات تۇرعىندارى دوستارى مەن تۋىستارىن شاقىرا وتىرىپ، "قوناقۇيلەردە تۇرۋ، مەيرامحانالاردا كەشكى اس، ويىن-ساۋىق بيلەتتەرى جانە تاعى باسقا بونۋستار الا الادى". اتاپ ايتقاندا، Meliá Desert Palm قوناقۇيىندە تۇرۋعا 45 پايىزدىق جەڭىلدىك، Aquaventure اكۆاپاركىنە جانە IMG Worlds of Adventure ساياباعىنا تەگىن بيلەتتەر، سونداي-اق ULA، Asia Asia جانە The 305 مەيرامحانالارىندا "ەكىنىڭ باعاسىنا ءبىر" اكسيالارى قولجەتىمدى. باا-دە جاز مەزگىلى ءداستۇرلى تۇردە جوعارى تەمپەراتۋراعا بايلانىستى تۋريزم ءۇشىن تومەن ماۋسىم سانالاتىنى ايتىلادى.
ەسكە سالا كەتەيىك، بۇعان دەيىن Air Astana ورمۋز بۇعازى مەن ايماقتاعى جاعدايدىڭ ناشارلاۋىنا بايلانىستى دۋبايعا رەيستەرىن 31 تامىزعا دەيىن توقتاتقان بولاتىن.