ۆەنگرياداعى انومالدى ىستىق پەن قۇرعاقشىلىق دۋنايدىڭ رەكوردتىق دەڭگەيدە تارتىلۋىنا اكەلدى: بۋداپەشتە سۋ دەڭگەيى 23 سانتيمەترگە دەيىن تومەندەدى، بۇل 2018 جىلعى الدىڭعى انتيرەكوردتان 10 سانتيمەترگە تومەن. وزەننىڭ سۋى سونشالىقتى تارتىلعان، كەيبىر ارنا ۋچاسكەلەرىندە ۆەلوسيپەدپەن جۇرۋگە بولادى، ال تاياز جەرلەردەن تاريحي ارتەفاكتىلەر تابىلۋدا، دەپ حابارلايدى infohub.kz سايتى.
ۆەنگريا ۆەلوكلۋبىنىڭ ءتوراعاسى گابور دەجو كيۋرتي بۋداپەشتتەن ۆاس قالاسىنا دەيىن 30 شاقىرىمنان استام جولدى ادەتتە سۋ استىندا بولاتىن ۋچاسكەلەرمەن ءجۇرىپ ءوتتى. بۇل تارتىلۋدىڭ ەڭ ەرەكشە سالدارىنىڭ ءبىرى بولدى.
ۆيشەگراد قالاسىنىڭ ماڭىندا قۇرعاعان تاياز جەردەن دوڭگەلەك ءپىشىندى تاس يادرو تابىلدى. ارحەولوگتاردىڭ بولجامىنشا، بۇل ۆيشەگراد بەكىنىسىن قورشاۋ كەزىندە قولدانىلعان ورتاعاسىرلىق كاتاپۋلتانىڭ سناريادى بولۋى مۇمكىن. بۇل نۇسقا راستالسا، ارتەفاكتىنىڭ جاسى بىرنەشە ءجۇز جىلدان ەكى مىڭ جىلعا دەيىن جەتۋى مۇمكىن.
بۇعان دەيىن دۋنايدىڭ قۇرعاعان ارناسىنان ەكىنشى دۇنيەجۇزىلىك سوعىس كەزىندەگى باتىپ كەتكەن كەمە دە تابىلعان بولاتىن.
ەۋروپالىق Copernicus باعدارلاماسىنىڭ سپۋتنيكتىك سۋرەتتەرى وزەننىڭ ءبىر جىل ىشىندە قانشالىقتى وزگەرگەنىن كورسەتەدى: 2025 جىلدىڭ شىلدەسىمەن سالىستىرعاندا يىرىمدەردە كەڭ قۇمدى جاعالاۋلار پايدا بولىپ، كەمە جۇزۋىنە كەدەرگى كەلتىرۋدە. كەيبىر ۋچاسكەلەردە جۇك جانە جولاۋشى كەمەلەرى ەندى وتە المايدى، ال بۋداپەشتە وزەن كولىگىنە شەكتەۋلەر ەنگىزىلدى.
ۆەنگريا بيلىگى قۇرعاقشىلىققا بايلانىستى توتەنشە جاعداي رەجيمىن جاريالادى. ەلدىڭ قورشاعان ورتانى قورعاۋ مينيسترلىگىنىڭ مالىمەتىنشە، سۋ تاپشىلىعى ايماقتاردىڭ تورتتەن ءۇش بولىگىندە بايقالادى. سينوپتيكتەر الداعى ەكى اپتادا جاڭبىر كۇتپەيدى، ال اۋا تەمپەراتۋراسى 39 گرادۋسقا دەيىن كوتەرىلۋى مۇمكىن.
بۇعان دەيىن ۆەنگريا 44 جىل ىشىندە العاش رەت ەلدەگى جالعىز اتوم ەلەكتر ستانسياسى «پاكش» جۇمىسىن ۋاقىتشا توقتاتاتىنى حابارلانعان بولاتىن. سەبەبى دۋناي سۋىنىڭ رەكوردتىق تومەندەۋى — ستانسيا رەاكتورلاردى سالقىنداتۋ ءۇشىن وسى سۋدى پايدالانادى.