وڭتۇستىك افريكا رەسپۋبليكاسىنداعى دۋربان قالاسىنىڭ ماڭىندا ورنالاسقان ۇيدە جاپپاي اتىس بولىپ، كەمىندە 11 ادام قازا تاپتى. سەيسەنبى كۇنى كەشكە كۆاماحۋتا ەلدى مەكەنىندەگى ۇيگە قارۋلى ادامدار باسىپ كىرىپ، 14 ادامعا وق جاۋدىرعان. پوليسيانىڭ مالىمدەۋىنشە، وقيعا ورنىندا ون ادام قازا تاپقان، تورتەۋى اۋرۋحاناعا جەتكىزىلگەن، ولاردىڭ بىرەۋى كەيىن جاراقاتىنان كوز جۇمعان.
پوليسيا قۇربانداردىڭ كەيبىرى زاڭسىز ارەكەتتەرگە قاتىسى بار دەپ كۇدىكتەنىپ، تەرگەۋ مۇددەسى ءۇشىن ءقازىر بۇل تۋرالى تولىق ايتا المايتىنىن جەتكىزدى. اتىستىڭ سەبەبى ازىرگە انىقتالماعانىمەن، قۇقىق قورعاۋ ورگاندارى «قارسى توپتار اراسىنداعى قاقتىعىستى» جوققا شىعارمايدى.
«قازىرگى دەرەكتەرگە قاراعاندا، 13 ەر ادام مەن جۇكتى دەپ ەسەپتەلەتىن ءبىر ايەل ءۇي ىشىندە كەش وتكىزىپ جاتقاندا، ءۇش ادام كەلىپ ولارعا وق جاۋدىرعان»، — دەلىنگەن پوليسيا مالىمدەمەسىندە. قازا تاپقانداردىڭ قاتارىندا سول ايەل دە بار.
وقيعا ورنىندا بولعان eNCA تەلەارناسىنىڭ ءتىلشىسىنىڭ ايتۋىنشا، قارۋلى ادامدار قاشىپ كەتەر الدىندا قۇربانداردىڭ بىرەۋىنە تيەسىلى كولىكتى ورتەپ كەتكەن. جاريالانعان بەينەجازبادا ورتەنگەن كولىك كورىنەدى.
پوليسيا كۇدىكتىلەردى ۇستاۋ ءۇشىن ارنايى ىزدەستىرۋ شارالارىن باستادى.
وڭتۇستىك افريكا رەسپۋبليكاسى الەمدەگى ەڭ جوعارى قىلمىس دەڭگەيى بار ەلدەردىڭ ءبىرى سانالادى. پوليسيا دەرەكتەرى بويىنشا، مۇندا كۇنىنە 60-تان استام ادام ولتىرىلەدى.
سوڭعى اپتالاردا كەمىندە توعىز ايەلدىڭ ولتىرىلگەنى، ولاردىڭ كەيبىرىنىڭ دەنەسى جول جيەگىنە تاستالعانى تۋرالى حابارلار ەلدەگى قورقىنىشتى كۇشەيتتى.
وتكەن جىلى يوحاننەسبۋرگتەگى تۇنگى كلۋبتا بولعان جاپپاي اتىستا توعىز ادام قازا تاپقان ەدى.
ەلدە قىلمىستىق توپتار اراسىنداعى اۋماق ءۇشىن تالاس، ەسىرتكى ساۋداسى جانە زاڭسىز كەن ءوندىرۋ ءجيى كەزدەسەدى، بۇل قاۋىمداستىقتارداعى زورلىق-زومبىلىقتى تۋدىرادى.
اقپان ايىندا پرەزيدەنت سيريل رامافوسا ۇيىمداسقان قىلمىس «دەموكراتيامىزعا، قوعامىمىزعا جانە ەكونوميكالىق دامۋىمىزعا ەڭ ءبىرىنشى كەزەكتەگى ءقاۋىپ» ەكەنىن ايتىپ، پوليسياعا قولداۋ كورسەتۋ ءۇشىن اسكەر جىبەرەتىنىن مالىمدەگەن.