Telegram نەگىزىن قالاۋشى پاۆەل دۋروۆ رەسەيدە حالىقارالىق ىزدەۋ جاريالانعان، استانادا وتكەن حالىقارالىق جاساندى ينتەللەكت وليمپياداسىنىڭ جەڭىمپازدارىنا جۇلدەلەردى ءقاۋىپسىز جەتكىزۋ جولىن ىزدەپ جاتقانىن حابارلادى. سىياقى سوماسى 106،5 مىڭ اقش دوللارىنان اسادى، دەپ حابارلايدى infohub.kz سايتى.
دۋروۆ ءوزىنىڭ رەسمي Telegram-ارناسىندا رەسەيلىك كوماندا كوماندالىق ەسەپتە ءبىرىنشى ورىن العانىن، ال ونىڭ تۋعان قالاسىنان شىققان ارتەم گوروحوۆ جەكە سىندا جەڭىسكە جەتكەنىن اتاپ ءوتتى. ول سونداي-اق جەكە ەسەپتە ەكىنشى ناتيجە كورسەتكەن قازاقستاندىق داۋجان بەكەتوۆتى اتاپ ءوتىپ، قازاقستاندى قۇتتىقتادى. «ءبىز ۇيىمداستىرۋشىلارمەن بايلانىسىپ، كەلەسى ايدا جەڭىمپازدارعا Telegram جۇلدەلەرىن (106 500 اقش دوللارىنان استام) ءقاۋىپسىز جەتكىزۋ ءۇشىن جۇمىس ىستەپ جاتىرمىز»، — دەپ جازدى ول.
IOAI 2026 حالىقارالىق جاساندى ينتەللەكت وليمپياداسى استانادا 2-8 تامىز ارالىعىندا ءوتتى. وعان 106 ەلدەن 500-گە جۋىق وقۋشى، تالىمگەر جانە قازىلار القاسىنىڭ مۇشەلەرى قاتىستى. ورتالىق ازيادا مۇنداي دەڭگەيدەگى جارىس العاش رەت ءوتتى.
جەكە ەسەپ قورىتىندىسى بويىنشا ءبىرىنشى ورىندى رەسەيدەن ارتەم گوروحوۆ، ەكىنشى ورىندى قازاقستاننان داۋجان بەكەتوۆ، ءۇشىنشى ورىندى قىتايدان شاو سزىسي يەلەندى. كوماندالىق ەسەپتە رەسەي قۇراماسى جەڭىمپاز اتاندى. Team Challenge اياسىندا ارنايى نوميناسيالارمەن كوماندالار اتاپ ءوتىلدى: روبوتتار جارىسىنداعى ۇزدىك ونەرى ءۇشىن Best Demonstration Award — جاڭا زەلانديا، روبوتتىڭ ەڭ كرەاتيۆتى ديزاينى ءۇشىن Creative Robot Design Award — گونكونگ، روبوتوتەحنيكادا AI-native تاسىلدەردى ۇزدىك قولدانعانى ءۇشىن AI-Native Robotics Award — برازيليا.
ەسكە سالايىق، رەسەيدە دۋروۆقا تەرروريستىك قىزمەتكە جاردەمدەسۋ ايىبى تاعىلىپ، ول حالىقارالىق ىزدەۋ جاريالانعان. فسب دەرەكتەرى بويىنشا، ايىپتاۋلار «دايۆينچيك» تانىسۋ چات-بوتىنا قاتىستى. روسكومنادزور مەسسەندجەر كومانداسىنا تىيىم سالىنعان كونتەنتتى جويۋ تۋرالى 150 مىڭنان استام تالاپ جىبەرىلگەنىن، ءبىراق ولار ورىندالماعانىن، سودان كەيىن دۋروۆتىڭ تەرروريستەر مەن ەكسترەميستەر تىزىمىنە ەنگىزىلگەنىن مالىمدەدى.