ۇلىبريتانيانىڭ ەڭ ءىرى پاروم پورتى — دۋۆردە ماسكا كيگەن ءبىر توپ ەر ادام جولدى بوگەپ، نارازىلىق اكسياسىن وتكىزدى. بۇل — يمميگرانتتارعا قارسى باعىتتالعان شارا دەپ حابارلايدى infohub.kz سايتى.
سەنبى كۇنى دۋۆر پورتىنا كىرە بەرىستە بىرنەشە ونداعان قارا كيىمدى، بەتتەرىن جاسىرعان ەر ادامدار نەگىزگى جولدى جاۋىپ تاستادى. پوليسيا وقيعاعا ارالاسىپ، نارازىلىق بىلدىرۋشىلەرمەن سويلەسۋدە. پورت اكىمشىلىگىنىڭ مالىمەتىنشە، قوعامدىق ءتارتىپتىڭ بۇزىلۋىنا بايلانىستى بارلىق كولىك قوزعالىسى توقتاتىلعان.
الەۋمەتتىك جەلىلەردە تاراعان ۆيدەولاردا ماسكا كيگەن ەر ادامداردىڭ پورتقا اپاراتىن ءىرى جولدىڭ بويىندا تۇرعانى كورىنەدى. ولاردىڭ ناقتى تالاپتارى ازىرگە بەلگىسىز. ۇلتتىق ماگيسترال قىزمەتىنىڭ حابارلاۋىنشا، نارازىلىق سالدارىنان 4 ميلگە (6،4 شاقىرىم) سوزىلعان كەپتەلىس پايدا بولىپ، كىدىرىس 45 مينۋتقا جەتكەن.
دۋۆر مەن فرانسياداعى كالە اراسىندا پاروم قاتىناسىن جۇزەگە اسىراتىن P&O Ferries كومپانياسى كەمەلەردىڭ كەستە بويىنشا ءجۇرىپ جاتقانىن، ال پارومعا ۇلگەرمەگەن جولاۋشىلارعا كەلەسى رەيسكە بيلەت ۇسىنىلاتىنىن مالىمدەدى.
لوندوننان وڭتۇستىك-شىعىسقا قاراي 70 ميل (110 شاقىرىم) جەردە ورنالاسقان دۋۆر بۇعان دەيىن دە فرانسيادان لا-مانش ارقىلى قايىقپەن كەلەتىن ميگرانتتارعا قارسى نارازىلىقتاردىڭ ورتالىعى بولعان. وسى تاقىرىپتى كەيبىر ساياساتكەرلەر، سونىڭ ىشىندە وڭشىل Reform UK پارتياسىنىڭ جەتەكشىسى نايدجەل فارادج دا قوزعاپ ءجۇر. ول جۇما كۇنگى سوزىندە باسپانا سۇراۋشىلاردى «باسىپ كىرۋ» دەپ اتادى.
لەيبوريستىك پارتيا ۇكىمەتى ۇلىبريتانيا مەن فرانسيا اراسىنداعى قۇقىق قورعاۋ ورگاندارىنىڭ ىنتىماقتاستىعىن كۇشەيتۋ ارقىلى بيىل لا-مانش ارقىلى وتەتىن ادامدار سانىن 2025 جىلمەن سالىستىرعاندا 40 پايىزعا ازايتۋعا قول جەتكىزگەنىن حابارلادى. دۋۆردان سايلانعان لەيبوريستىك پارتيا دەپۋتاتى مايك تەپپ بولسا، «دۋۆرعا ءتارتىپ بۇزۋ ءۇشىن كەلگەن اقىماقتاردى» سىنعا الدى.
ول Facebook-تەگى جازباسىندا: «ءباس تىگەمىن، سول "نارازىلىق بىلدىرۋشىلەردىڭ" كەز كەلگەنىنەن قايىقپەن كەلۋشىلەر سانى 40 پايىزعا ازايعانىن جانە ءبىز بۇل ماسەلەنى شەشۋ ءۇشىن تىنىمسىز ەڭبەك ەتىپ جاتقانىمىزدى سۇراساڭىز، ولار بىلمەيدى. ۇيلەرىڭە بارىڭدار، دەمالىڭدار نەمەسە جۇمىس تابىڭدار»، — دەپ جازدى.