الەمگە ايگىلى اكتەر ءارى رەجيسسەر دجەكي چان اكتاۋعا ساپارى كەزىندە قوعامدىق قاۋىپسىزدىكتى قامتاماسىز ەتۋگە ارنالعان روبوت-يتكە قىزىعۋشىلىق تانىتتى. ول قۇرىلعىنى ءوزىنىڭ ۇيالى تەلەفونىنا ءتۇسىرىپ الدى، دەپ حابارلايدى infohub.kz سايتى.
ماڭعىستاۋ وبلىسى قوعامدىق كوممۋنيكاسيالار ورتالىعىنىڭ Telegram ارناسىندا ايتىلعانداي، بەينەجازبادا اكتەردىڭ ءروبوت-يتتىڭ جۇمىسىن قىزىعۋشىلىقپەن باقىلاپ، ونى تەلەفونىنا ءتۇسىرىپ جاتقانى كورىنەدى. ۆەدومستۆو قوعامدىق قاۋىپسىزدىكتى نىعايتۋ ءۇشىن قازاقستاندا سيفرلىق تەحنولوگيالار كەزەڭ-كەزەڭىمەن ەنگىزىلىپ جاتقانىن قوسىمشا ايتتى. بۇعان دەيىن مۇنداي روبوتتاندىرىلعان پلاتفورمالار استانا مەن الماتىدا قولدانىلعان، ەندى بۇل تاجىريبە اكتاۋدا دا جۇزەگە اسىرىلۋدا.
ماڭعىستاۋ وبلىسى پوليسيا دەپارتامەنتىنىڭ مالىمەتىنشە، روبوت-يتتەر قوعامدىق ورىنداردى پاترۋلدەۋ، جەدەل جاعدايدى مونيتورينگىلەۋ جانە قۇقىق بۇزۋشىلىقتاردىڭ الدىن الۋ ءۇشىن ارنالعان. ولار جوعارى دالدىكتەگى كامەرالارمەن جانە ينتەللەكتۋالدى باقىلاۋ جۇيەلەرىمەن جابدىقتالعان. قۇرىلعىلار ناقتى ۋاقىت رەجيمىندە بەينەاقپاراتتى جەدەل باسقارۋ ورتالىعىنا جىبەرەدى، بۇل پوليسيا قىزمەتكەرلەرىنە وقيعالارعا جەدەل دەن قويۋعا مۇمكىندىك بەرەدى.
سونىمەن قاتار، روبوتتاندىرىلعان پلاتفورمالار كۇدىكتى زاتتاردى انىقتاۋعا، ءتۇتىن جانە ءورت بەلگىلەرىن تىركەۋگە قابىلەتتى، ال توتەنشە جاعدايلار تۋىنداعاندا ءتيىستى قىزمەتتەرگە اۆتوماتتى تۇردە حابارلاما جىبەرەدى. بۇل ولاردىڭ قوعامدىق ءتارتىپتى قامتاماسىز ەتۋدە عانا ەمەس، ازاماتتاردىڭ ءومىرى مەن دەنساۋلىعىن قورعاۋدا دا ماڭىزدى ءرول اتقاراتىنىن كورسەتەدى.
ەسكە سالايىق، بىرنەشە كۇن بۇرىن دجەكي چان «قۇدايدىڭ ساۋىتى 4: ۋلتيماتۋم» ءفيلمىنىڭ تۇسىرىلىمىنە قاتىسۋ ءۇشىن اكتاۋعا كەلگەن جانە قالا كوشەلەرىمەن اۆتوموبيل رۋلىندە ءجۇرىپ وتكەن ەدى.