رەسەيلىك رەپەر دەنيس ۋستيمەنكو-ۆاينشتەين، ساحناداعى اتى دجيگان، دەرەككوزدەرگە سۇيەنسەك، ءوز ۇيىندە ادامداردى كەپىلگە الىپ، وق اتقان. بۇل تۋرالى infohub.kz سايتى حابارلايدى.
Mash Telegram-ارناسىنىڭ مالىمەتىنشە، 3 شىلدەدەن 4 شىلدەگە قاراعان ءتۇنى ءانشى ءۇي قىزمەتكەرلەرىن شاقىرىپ الىپ، قولىنا قارۋ ۇستاپ ءتۇسىنىسۋ جۇرگىزگەن. ول قىزمەتكەرلەردى قىلمىس جاسادى دەپ ايىپتاپ، ومىرلەرىن ساقتاپ قالۋ ءۇشىن كىنالارىن مويىنداۋدى ۇسىنعان.
باسىلىمنىڭ دەرەگىنشە، دجيگان ءبىر قىزمەتكەردى بالالارعا زورلىق-زومبىلىق جاسادى دەپ مويىنداۋعا ماجبۇرلەپ، كەيىن وعان وق اتقان — ەر ادامنىڭ قولى مەن اياعىنا تيگەن. قالعان قىزمەتكەرلەردى رەپەر ساتقىندىق، اقپارات تاراتۋ جانە ۇلتشىلدىق دەپ ايىپتاعان. ولارعا قاشۋعا مۇمكىندىك بەرىپ، وق اتۋدى جالعاستىرعان. وقيعا 10 ساعاتقا سوزىلعان.
وسى ۋاقىت بويى دجيگان مەن وكسانا سامويلوۆانىڭ بالالارى ۇيدە بولىپ، شكافتا تىعىلىپ، سول كەزدە شەتەلدە جۇرگەن اناسىمەن بايلانىستا وتىرعان. كورشىلەر پوليسيانى، اۋىل كۇزەتىن جانە رەپەردىڭ دوستارىن شاقىرۋعا تىرىسقان. ءانشى قارسىلىق كورسەتىپ، ونى ۇستاۋعا ارەكەت ەتكەندەردىڭ ءبارىن ۇرعان. سودان كەيىن ونى توقتاتۋ مۇمكىن بولدى. ول يزرايلدەگى وڭالتۋ كلينيكاسىنا ءماجبۇرلى ەمدەلۋگە جىبەرىلدى.
Mash دجيگاننىڭ بۇرىنعى ايەلى وكسانا سامويلوۆا باسىلىممەن اڭگىمەسىندە بۇل وقيعانىڭ شىنىمەن بولعانىن راستاعانىن مالىمدەيدى.
SHOT Telegram-ارناسى قابىرعاداعى وقتار مەن وقيعاعا قاتىسۋشىلاردىڭ ءبىرى العان جاراقات كورىنەتىن قوسىمشا كادرلاردى جاريالادى.
قازىرگى تاڭدا دجيگان Instagram-دا ومىرىندەگى وقيعالارمەن بەلسەندى ءبولىسىپ ءجۇر. جاريالانىمدارىنا قاراعاندا، رەپەر ءيۋدايزمدى زەرتتەپ ءجۇر. «ءبىز ءوز سەنىمىمىزدى تاڭۋدى ماقسات ەتپەيمىز! يۋدايزم — ءدىن ەمەس، ول — جول، ءومىر سالتى، جاراتۋشىمەن جانە حالىقپەن ىشكى بايلانىس»، — دەپ جازدى ول.